Այն բանից հետո, երբ ասացինք, որ պատասխանել ենք Ադրբեջանին, որոշակի սխալ մեկնաբանություններ եղան, քանի որ գնահատականն այնպիսին էր, թե Հայաստանը մերժել է Ադրբեջանի առաջարկները: Այս մասին այսօր Ազգային ժողովում կառավարության հետ հարց ու պատասխանի ժամանակ ասաց արտաքին գործերի նախարար Արարատ Միրզոյանը՝ անդրադառնալով հարցին, թե արդյոք ՀՀ-ն ստացել է արձագանք Մինսկի խմբի համանախագահությունից Հայաստանի և Ադրբեջանի միջև խաղաղության պայմանագրի կնքման նպատակով բանակցություններ կազմակերպելու դիմումին ի պատասխան:
«Ես ուզում եմ ասել, որ Ադրբեջանի առաջարկներում Հայաստանի համար անընդունելի ոչինչ, ըստ էության, չկա, այլ բան, որ այդ առաջարկները ամբողջովին չէին հասցեագրում պոտենցիալ հնարավոր բանակցությունների ողջ օրակարգը, և ահա համապարփակ խաղաղության համար մենք համալրել ենք մեր առաջարկներով օրակարգ և փոխանցել ենք ԵԱՀԿ Մինսկի խմբի համանախագահությանը: Համանախագահողներից ինձ տեղեկացրել են, որ դրանք պաշտոնական Բաքվին փոխանցվել են, Բաքվից առայժմ պատասխան չունենք»,- ասաց նա:
Արարատ Միրզոյանը վստահեցրեց, որ Հայաստանի առաջարկները գրեթե 100 տոկոսով բացահայտված են իր հարցազրույցում:
«Մեր առաջարկների մեխերից մեկն այն է, որ մեզ համար շարունակում է սկզբունքային մնալ Լեռնային Ղարաբաղի հայության իրավունքների և նաև կարգավիճակի հարցը և հնարավոր չէ որևէ օրակարգ համարել ամբողջական, քանի դեռ այդ հարցը ևս այնտեղ չի քննարկվում»,- ասաց նա:
Նախարարը նշեց, որ Ուկրաինայում ռազմական գործողությունները բարդացրել են ԵԱՀԿ-ի աշխատանքները, բայց ելնելով կոնկրետ ազդակներից, վերահաստատեց, որ միջազգային հանրությունը շարունակում է ԼՂ հիմնախնդրի կարգավորումը տեսնել Մինսկի խմբի համանախագահության ձևաչափով, և սա հուսադրող է:
