Մենք գտնվում ենք Երրորդ հանրապետության պատմության ամենախաչմերուկային կետում. մի կետ, որի վրա Հայոց պետականությունը ճշգրտորեն գտնվել է ոչ մեկ անգամ: Մարտի 24-ի Կառավարության հերթական նիստի ժամանակ նշեց ՀՀ վարչապետ Նիկոլ Փաշինյանը։
«Որպեսզի մենք կարողանանք պատմական այդ նույն կետից հասնել մեզ համար ցանկալի հանգուցալուծման, մեզ հարկավոր է աննախադեպ ճկունություն, լիարժեք ոչ էմոցիոնալ վիճակ: Մեզ հարկավոր են մտածողության նոր բանաձեւեր: Ու մենք պիտի այս փոթորկված աշխարհաքաղաքական օվկիանոսի մեջ հայտնված մեր նավը, մեր նավակը հասցնենք խաղաղ հանգրվանի: Եւ համոզված եմ, մենք դա կանենք եւ դա թերեւս մեր պատմական առաքելությունն է»,- նկատեց վարչապետն՝ ընդգծելով, որ այն, ինչ այժմ կատարվում է աշխարհում, մեկնարկել է մեզ հետ տեղի ունեցածով եւ այսօր էլ տեղի ունեցողն ուղիղ անդրադառնում է եւ անդրադառնալու է մեզ վրա:
Անդրադառնալով տնտեսության հետ կապված հարցերին՝ Նիկոլ Փաշինյանն ընդգծեց.
«Ուզում եմ խոսել նաեւ լավատեսական նորությունների մասին: Պիտի արձանագրենք, որ մենք տնտեսական ակտիվությունը պահպանելու լավ հիմքեր ունենք: Օրինակ, մարտի առաջին 20 օրվա տվյալներով, նախորդ տարվա նույն ժամանակաշրջանի համեմատ, Հայաստանում ՀԴՄ-ով արձանագրված գործարքների թիվը ավելացել է շուրջ 510 հազար հատ գործարքով, իսկ դրամաշրջանառությունը աճել է ավելի քանի 60 միլիարդ դրամով, որը 120 միլիոն դոլարից ավելի շատ է: Սա, իհարկե, ֆունդամենտալ ցուցանիշ չէ, բայց որոշակի դրական ազդակ է, որը կապված է այն բանի հետ, որ 2022 թվականին մարդկանց մեծ ներհոսք ունենք դեպի Հայաստան եւ սա բավականին լավ տնտեսական էֆեկտներ է ստեղծելու»:
Վարչապետի խոսքով՝ Էական է նաեւ, որ փետրվար ամսին գրանցված աշխատատեղերի՝ փետրվար ամսվա համար բացարձակ ռեկորդ է գրանցվել՝ 646 հազար 77, որը 2021 թվականի համեմատ ավել է 10.3 տոկոսով, 2019 թվականի նկատմամբ՝ 12.7 տոկոսով:
«Նույնը վերաբերվում է միջին աշխատավարձին՝ 2022 թվականի փետրվարին գրանցված աշխատողների միջին աշխատավարձը 223 հազար 235 դրամ է, որը 2021 թվականի փետրվարի նկատմամբ ավել է 9 տոկոսով, 2019 թվականի փետրվարի համեմատ՝ 25.3 տոկոսով»,- հավելեց վարչապետը:
