«Շահումով խաղերի, ինտերնետ շահումով խաղերի և խաղատների մասին» օրենքում փոփոխություններ կատարելու մասին», «Հայաստանի Հանրապետության քաղաքացիական օրենսգրքում փոփոխություն կատարելու մասին» Հայաստանի Հանրապետության օրենքների նախագծերի փաթեթի վերաբերյալ Հայաստանի Հանրապետության կառավարության հերթական նիստի ժամանակ խոսեց ֆինանսների նախարար Տիգրան Խաչատրյանը:
«Այս նախաձեռնությունը նախատեսում է սահմանել փոփոխություններ, որոնք նպատակ ունեն սահմանափակել ինտերնետային շահումով խաղերի կազմակերպման հարթակների քաղաքացիների հասանելության եղանակները և նվազեցնել սոցիալական առումով հասարակության զգալի հատվածի խոցելիությունը: Այսօր շահումով խաղերի հարթակների անսահմանափակ հասանելիություն ունեն նաև մեր հասարակության սոցիալապես խոցելի որոշակի խմբեր, որոնք խաղային միջավայրում որոշակի հնարավորություններ փնտրելով հաճախ կորցնում են իրենց սահմանափակ ֆինանսական միջոցները և ավելի են խորացնում իրենց սոցիալական դժվարությունները»,- նշեց ֆինանսների նախարար Տիգրան Խաչատրյանը:
Տիգրան Խաչատրյանը նշում է, որ նախագծի հեղինակներն առաջարկում են, որ առաջին փուլում արգելվի տոտալիզատորների, շահումով խաղերի կազմակերպիչների և նմանատիպ այլ սուբյեկտների հաշիվներին կանխիկ եղանակով դրամական միջոցների մուտքագրումը, այդ թվում՝ վճարային տերմինալների միջոցով: Երկրորդ փուլում սույն օրենքը ուժի մեջ մտնելուց հետո վեց ամիս անց նախատեսվում է, որ հաճախորդները մասնակցության համար պետք է օգտվեն իրենց բանկային հաշիվներից՝ բացառելով այլ վճարահաշվարկային համակարգերից օգտվելու հնարավորությունը:
Հիշեցնենք, որ արդեն իսկ կառավարության նախաձեռնությամբ Ազգային ժողովում ընդունված օրենքով սեպտեմբերի 12-ից արգելվել է ինտերնետային շահումով խաղերի, վիճակախաղերի գովազդը հեռուստատեսությամբ, ռադիոյավ կամ համացանցով, որը նույն նպատակին է միտված:
Վարչապետ Նիկոլ Փաշինյանը նշեց, որ 2021 թվին խաղադրույքների ոլորտում տեղի է ունեցել երեք տրիլիոն ինը հարյուր միլիարդ դրամի շրջանառություն:
«Սա մեր երկրի բյուջեն կրկնակի գերազանցող ցուցանիշ է: 2018 թվականից մենք սիստեմատիկ սկսել ենք կրճառել այս ոլորտը և առաջին հերթին՝ սկսած գազալցակայաններից, երբ ամեն քայլին խաղային ապարատներ էին դրված, որոնք կանխիկ էին և ըստ էության գործում էին ստվերում, մենք այդ սեգմենտը հանեցինք: Բուքմեյքերական գրասենյակների քանակը նվազեցրել ենք՝ ընդ որում հաղթահարելով սարսափելի հակազդեցություն , այդ թվում՝ նույնիսկ շանտաժ», նշեց Նիկոլ Փաշինյանը:
«Գովազդը արգելված է ինտերնետային, հեռուստահեռարձակման ու բուքմեյքերական հարթակներում, կրճատեցինք այս գործունեությունը: Արդյունքում մենք տեսանք խնդրի իրական ծավալը: Հաջորդ փուլով կարևոր խնդիր է կանխիկի շրջանառությունը, և եթե որևէ մեկը պետության տված ամսական նպաստը, որը տրվում է, որպեսզի երեխայի նվազագույն կարիքները հոգա, տանում են և խաղադրույք են անում, և պարտվում են, մենք այդ խնդրին այլ լուծումներ պիտի տանք՝ կամ երեխային պիտի տանք, կամ մյուս ծնողին»,- ընդգծեց վարչապետ Նիկոլ Փաշինյանը:
Վարչապետը նշեց, որ ոլորտը պետք է պատշաճ կարգավորվի, և հարկային դաշտ մտնեն նաև այս ոլորտում գործունեություն ծավալողները: Հարցը դրվեց քննարկման և ընդունվեց:
