Ներքին Հանդ կատարած փաստահավաք այցի արդյունքները, որոնք նկարագրված էին մեր հայտարարության մեջ, որևէ ձևով չէին հակասում կամ հերքում ՊՆ տարածած՝ դրան նախորդող, ինչպես նաև հաջորդող տեղեկատվությանը։ Այս մասին կառավարության նիստից հետո լրագրողների հետ զրույցում ասաց ՄԻՊ Քրիստիննե Գրիգորյանը։
«Փաստերի ծանոթացման մեր մեթոդը եղել է բնակիչների հետ հանդիպումները, այսինքն՝ Ներքին Հանդի բնակչների, վարչական ղեկավարի և այլ պաշտոնատար անձանց հետ։ Մենք արձանագրել էինք՝ բնակիչներն ասել էին, որ վրանները, շարժը նոր են տեսնում։ Նաև խնդիր էին բարձրացրել, որ ռիսկեր կան արդեն գյուղատեղիից ավելի հեռու տեղակայված հուշակոթողի, եկեղեցու հարակից տարածքը՝ որպես արոտավայր իրենց կողմից օգտագործելու առումով։ Ի՞նչ էր ասել ՊՆ-ն։ Նախարարությունն առաջին և երկրորդ հաղորդագրությամբ ասել էր, որ այդ դիրքերը նոր են սկսել ակտիվորեն կահավորվել և օգտագործվել, այսինքն՝ մեր ասածը, որ բնակիչները նոր են տեսել և նոր են սկսել կահավորելը, չեն հակասում իրար»,- հայտնեց ՄԻՊ-ը։
