Ամերիկացի դերասան Շոն Փենը կոչ է արել խոսքը տալ Ուկրաինայի նախագահ Վլադիմիր Զելենսկիին՝ մարտի 28-ի գիշերը կայանալիք «Օսկար»-ի արարողության ժամանակ։ Նրա կոչը հրապարակել է CNN-ը։
Փենն ասել է, որ եթե կինոակադեմիան հրաժարվի խոսքը տալ Զելենսկիին, ապա անհրաժեշտ է բոյկոտել Օսկարի արարողությունը։
«Ինչ վերաբերում է ինձ, եթե դա տեղի ունենա, ապա երբ վերադառնամ [ԱՄՆ], հրապարակայնորեն կհալեցնեմ իմ արձանիկները»,- ընդգծել է դերասանը։
Շոն Փենը երկու «Օսկարի» դափնեկիր է «Միստիկ գետ» և «Հարվի Միլք» ֆիլմերի համար։
Ավելի վաղ New York Post տաբլոիդ թերթը, վկայակոչելով աղբյուրներ, հայտնել էր Զելենսկու՝ «Օսկար» մրցանակաբաշխության ժամանակ ելույթ ունենալու պլանների մասին։
«Ինչպես ես հասկացա, ի վերջո որոշվեց չանել դա [«Օսկար»-ի ժամանակ խոսքը Զելենսկիին տալ]», – ասել է Փենը։
Նա նաեւ հույս է հայտնել, որ կինոակադեմիան կփոխի իր կարծիքը, այլապես դա կլինի «ամենանպարկեշտ պահը Հոլիվուդի պատմության մեջ»։
Շոն Փենն այժմ գտնվում է Լեհաստանում, որտեղ օգնում է ուկրաինացի փախստականներին։ Մինչ այդ նա Ուկրաինայում էր՝ վավերագրական ֆիլմի նկարահանման հրապարակում։ Փետրվարի վերջին նա այնտեղ հանդիպել է Վլադիմիր Զելենսկու հետ։
