Բանակցությունների արդյունքներով ադրբեջանական կողմը իրականացրել է իր ստորաբաժանումների դուրսբերումը Փառուխ բնակավայրի տարածքից, ասված է Լեռնային Ղարաբաղում ռուս խաղաղապահների առաքելության վերաբերյալ Ռուսաստանի ՊՆ հաղորդման մեջ:
Նշվում է նաև, որ Ասկերանի շրջանում Ադրբեջանի զինված ուժերի կողմից հրադադարի պահպանման ռեժիմի խախտման երկու դեպք է գրանցվել. փոխհրաձգության արդյունքում յուրաքանչյուր կողմից վիրավորվել է երկու հոգի։Այս մասին հայտնում է Azatutyun.am-ը։
«Ռուսական խաղաղապահ զորախմբի հրամանատարությունը, համագործակցելով հակամարտող կողմերի ներկայացուցիչների հետ, կայունացրել է իրավիճակը», – ասված է հաղորդագրության մեջ։
Ադրբեջանի պաշտպանության նախարարությունն էլ «ափսոսանքով» պնդում է, թե ՌԴ ՊՆ հաղորդագրության «որոշ կետեր» չեն համապատասխանում իրականությանը, և ադրբեջանական բանակի դիրքերը Փարուխ գյուղում ու կից լեռնային շրջաններում «փոփոխություն չեն կրել»:
Այսօր, Ստեփանակերտի պաշտոնական տեղեկության համաձայն, շփման գծի ամբողջ երկայնքով, այդ թվում նաև արևելյան սահմանագոտում, հարաբերական կայուն է, հրադադարի էական խախտումներ չեն արձանագրվել:
Գյուղում իրավիճակը, բնակիչների տեղեկացմամբ, երեկվանից հանդարտվել է, սակայն կանայք, երեխաներն ու ծերերը դեռ գյուղ չեն վերադարձել:
Արդեն 3 շաբաթ է` Արցախի ավելի քան 100 հազար բնակիչները զրկված են գազից: Արցախի բնական գազ մատակարարող հիմնական խողովակը մարտի 8-ից էր վնասված, վերանորոգումից կարճ ժամանակ անց, սակայն, Ադրբեջանը կրկին դադարեցրեց գազամատակարարումը։
Այսօր ադրբեջանական կողմը հայտարարեց, թե Լեռնային Ղարաբաղում բնական գազի մատակարարումը կվերսկսվի մարտի 29-ից: Ուշագրավ է, որ այս մասին «Ազերիգազից» էին հայտնել:
Շատ չանցած Ստեփանակերտից արձագանքեցին այս հայտարարությանը: «Արցախգազը» կեղծ ու սադրիչ բնույթի ապատեղեկատվություն է որակում այդ հայտարարությունը, որը, ըստ ընկերության, հետապնդում է ստեղծված բարդ իրավիճակից օգտվելու և արցախահայությանն ու միջազգային հանրությանը տեղեկատվական դաշտում ապակողմնորոշելու նենգ նպատակ։
Ըստ ադրբեջանական «Ազերիգազ»-ի` վերացվել են Արցախի գազաբաշխիչ գծի վրա տեղի ունեցած վթարի հետևանքները: Թե ինչ կապ ունի «Ազերիգազը» խողովակի վերականգնման հետ, առայժմ հայտնի չէ:
