Ռուսաստանի Դաշնության հետ բանակցություններում Ուկրաինայի առաջնահերթությունները մնում են անփոփոխ՝ ինքնիշխանություն, տարածքային ամբողջականություն և անվտանգության երաշխիքներ։ Այս մասին այսօր հայտարարել է Ուկրաինայի նախագահ Վլադիմիր Զելենսկին։
«Առջևում բանակցությունների նոր փուլն է, քանի որ մենք խաղաղություն ենք փնտրում առանց հապաղելու: Ինչպես տեղեկացա, արդեն իսկ Թուրքիայի տարածքում դեմ առ դեմ հանդիպման հնարավորություն և անհրաժեշտություն կա: Սա վատ չէ, սպասենք արդյունքին, մեր առաջնահերթությունները հայտնի են, Ուկրաինայի ինքնիշխանությունն ու տարածքային ամբողջականությունը կասկածի տակ չի առնվում, մեր պետության անվտանգության արդյունավետ երաշխիքները պարտադիր են, մեր նպատակը նույնպես ակնհայտ է՝ խաղաղություն և նորմալ կյանքի շուտափույթ վերականգնում Ուկրաինայում»,- ասել է Զելենսկին տեսաուղերձում, որի ձայնագրությունը հրապարակվել է նրա գրասենյակի Telegram ալիքում։
Ավելի վաղ ռուսական պատվիրակության ղեկավար, նախագահի օգնական Վլադիմիր Մեդինսկին Telegram-ի իր ալիքում հայտնել էր, որ Ռուսաստանի և Ուկրաինայի պատվիրակությունները որոշել են դեմ առ դեմ բանակցությունների հաջորդ փուլն անցկացնել մարտի 29-30-ը։
Թուրքիայի նախագահի գրասենյակն էլ հայտնել է, որ հեռախոսազրույցների ընթացքում Ռեջեփ Թայիփ Էրդողանը և ՌԴ նախագահ Վլադիմիր Պուտինը պայմանավորվել են Ստամբուլում պատվիրակությունների հանդիպում կազմակերպել։
Բանակցությունների առաջին փուլը կայացել է փետրվարի 28-ին Բելառուսի Գոմելի շրջանում, հանդիպումը տևել է հինգ ժամ։ Ավելի ուշ կայացան ևս երկու դեմ առ դեմ փուլեր, ինչպես նաև հանդիպումներ օնլայն ձևաչափով։
