Հայաստանում գույք ձեռք բերելու վերաբերյալ օրենսդրական կարգավորումներն այնպիսին են, որ ՀՀ-ում ոչ գյուղատնտեսական նշանակության անշարժ գույք կարող են ձեռք բերել ցանկացած պետության քաղաքացիներ:
Այս մասին այսօր ՀՀ Ազգային ժողովում լրագրողների հետ զրույցում նշեց Կադաստրի կոմիտեի ղեկավար Սուրեն Թովմասյանը։
Նա անդրադարձավ նաև Հայաստանում օտարերկրացիների, մասնավորապես՝ Թուրքիայի քաղաքացիների կողմից անշարժ գույք ձեռք բերելուն։ «2002 թ-ից սկսած՝ 72 միավոր գույք է գնվել Թուրքիայի քաղաքացիների կողմից, մեծ մասը՝ բնակարաններ, Ադրբեջանի քաղաքացիները՝ շուրջ 5 գույք»,- նշեց նա:
Կադաստրի կոմիտեի ղեկավարի մեկնաբանմամբ՝ եթե Ադրբեջանի քաղաքացին ՀՀ-ում գույք է ձեռք բերում, ապա պետք է ունենա ճանապարհորդական անձնագիր, որը տրամադրելու համար բոլոր անհրաժեշտ գործողությունները կատարվում են, ուստի մտահոգության կարիք չկա:
Հարցին՝ արդյոք Ադրբեջանի և Թուրքիայի քաղաքացիների կողմից վերջին շրջանո՞ւմ է նկատվել գույք ձեռք բերելու ակտիվությունը, Թովմասյանը բացասական պատասխան տվեց։
