Գերմանիայի կանցլեր Օլաֆ Շոլցը հայտարարել է, որ գերմանացի գնորդները կշարունակեն Ռուսաստանից մատակարարվող գազի դիմաց վճարել եվրոյով։ Այս մտադրության մասին հայտարարել են նաեւ «յոթի» (G7) երկրները։
«Պայմանագրերը, որոնց մասին մենք գիտենք, բոլորը ճնշող մեծամասնությամբ եվրոյով են, և ընկերությունները կվճարեն համապատասխանաբար: Այժմ մենք ունենք մի իրավիճակ, երբ պայմանագրերը պետք է կատարվեն»,- ասել է պարոն Շոլցը (մեջբերում է ՌԻԱ Նովոստին):
Այսօր՝ մարտի 28-ին, Գերմանիայի էներգետիկայի նախարար Ռոբերտ Հաբեկը հայտարարել է, որ G7 երկրները մտադիր չեն ռուսական գազի դիմաց վճարել ռուբլով։ Նրա խոսքով՝ G7 երկրները պատրաստ են Ռուսաստանից գազի մատակարարումը դադարեցնելու բոլոր սցենարներին:
Գերմանիան ռուսական գազից կախված է մոտ 55%-ով, հունվարին հայտարարել է Գերմանիայի փոխկանցլեր Ռոբերտ Հաբեկը։ Վառելիքի հիմնական ծավալները Գերմանիա են հասնում ոչ թե Ուկրաինայի ու Լեհաստանի, այլ «Հյուսիսային հոսք 1» խողովակաշարով։
Ավելի վաղ ՌԴ նախագահ Վլադիմիր Պուտինը հանձնարարել էր կառավարությանը, Կենտրոնական բանկին և «Գազպրոմին» մինչև մարտի 31-ը «ոչ բարեկամ երկրների» հետ գազային հաշվարկները փոխանցում կատարել ռուսական ռուբլով։ Նախագահի մամուլի քարտուղար Դմիտրի Պեսկովն այսօր ասել է, որ եթե Եվրոպան հրաժարվի գազի համար վճարել ռուսական արժույթով, ապա Ռուսաստանը հաստատ վառելիքը անվճար չի մատակարարի։
