Ստամբուլում սկսվել են ռուսական և ուկրաինական պատվիրակությունների միջև բանակցությունները։ Դրանք անցկացվում են Դոլմաբախչե պալատում, Թուրքիայի նախագահ Թայիփ Էրդողանի մասնակցությամբ։
Բանակցություններից առաջ Էրդողանը կարճ ելույթով դիմել է բանակցողներին.
«Հակամարտության երկարաձգումը ոչ մեկին ձեռնտու չէ, պատերազմում հաղթողներ չկան»,- ասել է նա՝ գոհունակություն հայտնելով, որ հյուրընկալում է պատվիրակություններին և նպաստում նրանց ջանքերին՝ խաղաղություն հաստատելու նման կրիտիկական շրջանում։
Ցանկանալով, որ կայանալիք հանդիպումներն օգուտ բերեն Ուկրաինային ու Ռուսաստանին, տարածաշրջանին և ողջ մարդկությանը՝ Էրդողանն ասել է, որ լիովին աջակցում է բանակցություններին այս համատեքստում:
Այնուհետ Էրդողանը լքել է պալատը և պաշտոնական այցով մեկնել Ուզբեկստան, հայտնում է Anadolu գործակալությունը:
Սա Ռուսաստանի և Ուկրաինայի միջև բանակցությունների չորրորդ փուլն է, այն Ստամբուլում է անցկացվում Էրդողանի, ՌԴ նախագահ Վլադիմիր Պուտինի և Ուկրաինայի նախագահ Վլադիմիր Զելենսկիի պայմանավորվածությամբ:
Նախորդ բանակցությունների արդյունքում կողմերը նշել են իրենց դժվար ընթացքը և փոքր առաջընթացը՝ պայմանավորված կողմերի սկզբունքորեն հակառակ դիրքորոշումներով։ Առաջին բանակցությունները կայացել են փետրվարի 28-ին, Բելառուսում:
Հիշեցնենք՝ ռազմական գործողությունները Ուկրաինայում շարունակվում են արդեն 34 օր:
