Ուկրաինայի տարածքային ամբողջականության հարցում փոխզիջումներ չեն լինի. Զելենսկի

Ուկրաինայի նախագահ Վլադիմիր Զելենսկին տեսաուղերձ է հղել պատերազմի 34-րդ օրվա արդյունքների վերաբերյալ։ Դրանում նա մեկնաբանել Է Ռուսաստանի եւ Ուկրաինայի միջեւ մարտի 29-ին Ստամբուլում կայացած խաղաղ բանակցությունների նոր փուլի արդյունքները:

Այն ազդանշանները, որոնք մենք լսում ենք բանակցային հարթակից, կարելի է դրական անվանել։ Բայց այդ ազդանշանները չեն խլացնում ռուսական արկերի պայթյունները։ Իհարկե, մենք տեսնում ենք բոլոր ռիսկերը։ Իհարկե, մենք հիմք չենք տեսնում վստահելու մի պետության առանձին ներկայացուցիչների խոսքին, որը շարունակում է պայքարել մեր կործանման համար։ Ուկրաինացիները միամիտ մարդիկ չեն. Ուկրաինացիներն արդեն սովորել են և՛ ներխուժման այս 34 օրերի, և՛ Դոնբասում պատերազմի վերջին ութ տարիների ընթացքում, որ կարելի է վստահել միայն կոնկրետ արդյունքի։

Իհարկե, Ուկրաինան պատրաստ է բանակցությունների և կշարունակի բանակցային գործընթացը այնքանով, որքանով իսկապես կախված է մեզանից։ Մենք արդյունքի հույս ունենք։ Պետք է լինի իրական անվտանգություն մեզ համար, պետության, ինքնիշխանության համար։ Ուկրաինայի ինքնիշխանությունն ու տարածքային ամբողջականությունը պետք է երաշխավորված լինեն. Ինքնիշխանության և մեր տարածքային ամբողջականության հարցում փոխզիջումներ չեն կարող լինել և չեն լինի։ Սրանք հստակ սկզբունքներ են, հնարավոր արդյունքի հստակ տեսլական։

Ստամբուլում կայացած հանդիպման արդյունքում Ուկրաինան Ռուսաստանի հետ խաղաղության պայմանագրի կնքման մի շարք առաջարկներ է ներկայացրել։ Մասնավորապես, Կիևը Մոսկվային առաջարկում է 15 տարի շարունակ երկկողմ բանակցություններ վարել Ղրիմի և Սևաստոպոլի կարգավիճակի շուրջ՝ չօգտագործելով զինված ուժերը հակամարտությունը լուծելու համար։ Դոնբասի հարցը որպես առանձին կետ պետք է քննարկեն երկու երկրների նախագահները։

Ուկրաինան նաև հայտարարեց, որ պատրաստ է հրաժարվել ՆԱՏՕ-ին և այլ դաշինքներին միանալու գաղափարից՝ անվտանգության երաշխիքների դիմաց։ Միաժամանակ, ուկրաինական պատվիրակության մասնակիցներն ընդգծել են, որ Կիևը ճանաչում է երկրի միայն այն սահմանները, որոնցում եղել է 1991թ.:

Իր հերթին ռուսական կողմը Ստամբուլում կայացած հանդիպման արդյունքներով հայտարարեց, որ կտրուկ կնվազեցնի ռազմական ակտիվությունը Կիևի և Չեռնիգովի ուղղություններում։