Լեռնային Ղարաբաղը Հայաստանի հետ ունի միայն ցամաքային կապ՝ միայն Լաչինի միջանցքով, և Լաչինի միջանցքը Ադրբեջանի կողմից որևէ կերպ վերահսկվող տարածք դարձնելը նշանակում է մեկ բան՝ Լեռնային Ղարաբաղի հայաթափում: Այս մասին այսօր կառավարության հերթական նիստին օրակարգին անցնելուց առաջ հայտարարեց ՀՀ վարչապետ Նիկոլ Փաշինյանը:
«Մենք կրկին արձագանքում ենք՝ Լաչինի միջանցքի համեմատությունը Հայաստանի տարածքով բացվելիք ճանապարհի հետ անընդունելի է: Նոյեմբերի 9-ի հայտարարությունը Հայաստանի տարածքով որևէ միջանցքի գոյություն չի նախատեսում, և Հայաստանը չի ընդունել, և չի ընդունելու միջանցաքային որևէ տրամաբանություն: Մյուս կողմից՝ մենք պատրաստ ենք մեր առաջարկների շրջանակում բացել ճանապարհը և երկաթուղին, բայց անհրաժեշտություն ենք համարում դե յուրե նշանակություն ունեցող համաձայնագիր ստորագրել Ադրբեջանի հետ: Քանի որ մենք շատ կոնկրետ ռիսկ ենք տեսնում, որ Հայաստանը կկառուցի և ճանապարհը, և երկաթուղին, իսկ Ադրբեջանը կհրաժարվի բացել սահմանը և կստացվի, որ մի քանի հարյուր միլիոն դոլար ներդրում պահանջած ենթակառուցվածքներից չի կարողանա օգտվել Հայաստանը, ոչ Ադրբեջանը, ոչ երրորդ երկրները»,- ասաց նա:
Նիկոլ Փաշինյանն ասաց, որ այսօր առաջարկում են երկաթուղու վերագործարկման մասին 2021 թվականի դեկտեմբերի 14-ին ձեռք բերված պայմանավորվածությունները արձանագրել դե յուրե, համաձայնեցնել երկաթուղու պարամետրերը և սկսել շինարարությունը կամ դա անել փաթեթով՝ ներառելով ավտոմոբիլային ճանապարհը, և մենք սա պատրաստ ենք անել այն պահից, երբ Ադրբեջանը դրական արձագանք կտա մեր առաջարկներին:
