Մեծ Բրիտանիայի Կառավարության հաղորդակցության շտաբի պետը զգուշացրել է, որ Չինաստանը չպիտի չափից շատ մտերմանա Ռուսաստանի հետ Ուկրաինա ներխուժելուց հետո։
Ջերեմի Ֆլեմինգն ասել է, որ Ռուսաստանը շատ սխալ է գնահատում իրավիճակն Ուկրաինայում: Պուտինի խորհրդատուներն ուղղակի վախենում են նրան ճիշտն ասելուց:
Հավելել է, որ համաշխարհային առաջատար դառնալու Չինաստանի ձգտումը ոչ մի կերպ չի կարող շահել այնպիսի երկրի հետ սերտ դաշնակցությունից, որը դիտավորյալ և անօրինական կերպով անտեսում է միջազգային կանոնները:
Պուտինը հատուկ ստրատեգիական որոշում է կայացրել. միավորվել Չինաստանի հետ, քանի որ այն ավելի հզոր է դառնում՝ ի տարբերություն ԱՄՆ-ի:
Կրեմլը ներկայիս ճգնաժամում Չինաստանին դիտարկում է որպես զենքի, տեխնոլոգիաների մատակարար և իր նավթի ու գազի պոտենցիալ շուկա:
Ռուսաստանը հասկանում է, որ ժամանակ անց Չինաստանն ուժեղանալու է ռազմական և տնտեսական առումով: Նրանց որոշ շահերը հակասելու են, և ՌԴ-ն կարող է դուրս մղվել առաջատարների շարքից:
Միևնույն ժամանակ՝ կրկնելով ԱՄՆ-ի և Ուկրաինայի պաշտոնյաների մեկնաբանությունները, նշել է, որ Պուտինը թերագնահատել է կոալիցիայի հզորությունը: Նա թերագնահատել է պատժամիջոցային ռեժիմի տնտեսական հետևանքները և գերագնահատել է իր զորքերի արագ հաղթանակ ապահովելու հնարավորությունները:
Աղբյուրը՝ CNN News
Թարգմանությունը՝ Մանե Հովհաննիսյանի։
