Ամերիկացի դերասան Ուիլ Սմիթն Օսկարի մրցանակաբաշխության ժամանակ բեմում կատակերգու Քրիս Ռոքին հարվածելուց հետո ինքնակամ դուրս է եկել ամերիկյան Կինոարվեստի և գիտության ակադեմիայից: Դերասանի հայտարարությունը հրապարակել է Variety ամսագիրը:
«Ես չեմ արդարացրել ակադեմիայի վստահությունը: Ես դուրս եմ գալիս Կինոարվեստի և գիտության ակադեմիայից ու պատրաստ եմ կրել ցանկացած պատիժ, որը տեղին կհամարի կառավարիչների խորհուրդը»,- ասել է Սմիթը:
Կինոակադեմիան միջադեպի առնչությամբ սկսել է կարգապահական հետաքննություն իրականացնել Սմիթի նկատմամբ: CNN-ի տվյալներով՝ ապրիլի 18-ին նախատեսվում է Ակադեմիայի կառավարիչների խորհրդի նիստը, որի ժամանակ դերասանի նկատմամբ կարող են միջոցներ ձեռնարկել: Մասնավորապես հաղորդվում էր, որ հնարավոր է դադարեցվեր Կինոակադեմիայում նրա անդամակցությունը, ինչպես նաև կիրառվեին այլ պատժամիջոցներ ևս:
«Կինոակադեմիայի 94-րդ մրցանակաբաշխությանն իմ կատարած քայլը ցնցող էր, ցավոտ ու աններելի: Երկար է այն անձանց ցուցակը, ում ես վնասել եմ, այդ թվում և՝ Քրիսին, նրա ընտանիքին, իմ շատ ընկերների ու հարազատների, դահլիճում գտնվող անձանց և ողջ աշխարհի հեռուստադիտողներին: Փոփոխությունները ժամանակի կարիք ունեն, և ես պատրաստ եմ աշխատանք տանել, որպեսզի այլևս երբեք բռնությունը բանականությանը չհաղթի»,- ասել է Ուիլ Սմիթը:
