Ինչպես ավելի վաղ հայտնել էինք, ՀՀ ԱԳ նախարար Արարատ Միրզոյանն այսօր ԱԳՆ-ում ընդունել է Իտալիայի արտաքին գործերի և միջազգային համագործակցության նախարար Լուիջի դի Մայոյին։
Այնուհետև երկու երկրների արտգործնախարարները հանդես են եկել մամուլի համար հայտարարություններով։
ՀՀ ԱԳ նախարարի խոսքով՝ հատկանշական է, որ այս այցը տեղի է ունենում Հայաստանի և Իտալիայի միջև դիվանագիտական հարաբերությունների հաստատման 30-ամյակի հոբելյանական տարում, ինչը նոր լիցք կհաղորդի երկու երկրների փոխշահավետ համագործակցությանը։
«Հայաստանը մեծապես կարևորում է Իտալիայի հետ երկկողմ հարաբերությունների շարունակական զարգացումը՝ հիմնված հարուստ ավանդույթների, հարուստ պատմական շփումների և ընդլայնված գործընկերության համաձայնագրի և ընդհանուր արժեքների, ժողովրդավարական սկզբունքների վրա։
Այսօրվա քննարկումների ընթացքում մենք երկուստեք գոհունակություն ենք հայտնել Հայաստանի և Իտալիայի միջև քաղաքական երկխոսության բարձր մակարդակի և բարձրաստիճան փոխայցերի դրական դինամիկայի առնչությամբ։ Արձանագրել ենք, որ տարեցտարի աճում է երկկողմ առևտրաշրջանառության և իտալական ներդրումների ծավալը Հայաստանում և հավաստիացումներ ենք արել երկուստեք, որ հետաքրքրված ենք այս ներդրումների և ապրանքաշրջանառության ծավալներն ավելացնելու մեջ»,- ասաց Արարատ Միրզոյանը։
Նախարարն ընդգծեց՝ թեև պատրաստակամությանը և առկա կապերին՝ տնտեսական ոլորտում առկա է նաև չօգտագործված հսկայական ներուժ։
«Մենք այդ ներուժի իրացման գործում կարևորում ենք նաև հայ-իտալական միջկառավարական հանձնաժողովի աշխատանքը»,- նշեց Միրզոյանը։
Նախարարը հայտնեց, որ Իտալիայի իր գործընկերոջ հետ հանդիպմանն անդրադարձել են նաև Հայաստան-ԵՄ գործընկերության օրակարգին՝ Արևելյան գործընկերության շրջանակներում փոխգործակցությանը, ողջունելի համարեց Իտալիայի համալսարաններում հայագիտական ամբիոնների գործունեությունը ու դրա ընդլայնումը։
Արտգործնախարարը տեղեկացրեց՝ հանգամանալից անդրադարձ է կատարվել միջազգային և տարածաշրջանային անվտանգության և կայունության հարցերին։
«Ես ներկայացրել եմ ադրբեջանական զինված ուժերի կողմից ԼՂ-ի Փառուխ գյուղ ներխուժման, հակամարտության գոտում հրադադարի ռեժիմի պարբերական խախտումների, Արցախում հումանիտար ճգնաժամ ստեղծելուն ուղղված քայլերի, ԼՂ-ում էթնիկ զտումներ անցկացնելու Ադրբեջանի քաղաքականության մասին և այլ դրսևորումների հետևանքով ստեղծված իրավիճակը։
Կարծում ենք, որ միջազգային հանրությունը պատշաճ և հասցեական արձագանք պետք է տա Ադրբեջանի այս գործողություններին և աջակցի Հարավային Կովկասում խաղաղություն հաստատելու ջանքերին։ Այս առումով ուզում եմ նշել, որ ԵԱՀԿ ՄԽ համանախագահող երկրներն արդեն իսկ հստակ և հասցեկան արձագանքել են ԼՂ-ում իրադրության վերջին սրմանը՝ փաստելով, որ այն հետևանք է ադրբեջանական զորքերի շարժի։
Ես կրկին վերահաստատել եմ Հայաստանի պատրաստակամությունը՝ շարունակելու խաղաղ բանակցությունները և խաղաղության պայմանագիր կնքել արդյունքում՝ ԵԱՀԿ ՄԽ համանախագահության մանդատի ներքո և շրջանակներում, տեղեկացրել եմ, որ Ադրբեջանն առաջարկներ է փոխանցել մեզ, որոնք մենք համարել ենք ընդունելի, բայց ողջ ամբողջական, և լրացրել ենք այդ առաջարկները մեր առաջարկներով և բարձրաձայնել ենք մեր պատրաստակամությունը՝ անմիջապես սկսել բանակցությունները այդ ամբողջական սկզբունքների հիման վրա, ՄԽ համանախագահության շրջանակներում։
Անդրադարձ ենք կատարել, բնականաբար, 44-օրյա պատերազմից հետո առաջացած և դեռ չլուծված հումանիտար խնդիրներին և առաջին հերթին, բնականաբար, հայ ռազմագերիների անհապաղ ազատ արձակման անհրաժեշտությանը և բարձր ենք գնահատում Իտալիայի խորհրդարանի կողմից անցյալ տարվա մարտին ընդունած բանաձևը։
Անշուշտ, շարունակում է մտահոգիչ մնալ Ադրբեջանի վերահսկողության տակ անցած տարածքներում հայկական մշակութային հուշարձանների ճակատագիրը, և պետք է ընդգծել, որ ինչպես և նախկինում, այժմ ևս ՅՈՒՆԵՍԿՕ-ի տարածաշրջանային այցը և այս առաքելությունը շարունակում է խիստ պահանջված մնալ։
Ողջունում ենք նաև Արցախի և նրա ժողովրդի պաշտպանությանն ուղղված Իտալիաի մոտ 50 շրջանային և քաղաքային խորհուրդների կողմից ընդունած փաստաթղթերը»,- ասաց Արարատ Միրզոյանը։
