Ես այն տեսակետին եմ, որ բանակ պետք է կատարյալ առողջ գնան: Այս մասին ՀՀ ԱԺ պաշտպանության եւ անվտանգության հարցերի մշտական հանձնաժողովի նիստին ասաց հանձնաժողովի նախագահ, «Քաղաքացիական պայմանագիր» խմբակցության անդամ Անդրանիկ Քոչարյանը:
«Բայց պետք է նայել համազգային առողջության խնդիրները ինչ վիճակում են, որովհետև այդտեղ էլ խնդիր ունենք»,- ասաց նա:
Նա համոզմունք հայտնեց, որ հիվանդություններ կան, օրինակ՝ հաճախամիզությունը, որի դեպքում չի կարելի տանել բանակ: «Դա ամենավտանգավոր բաներից մեկն է, այդ մարդը երբ այդ արատով հայտնվեց Զինված ուժերում, թիրախավորվում է»,-ասաց նա:
Անդրադառնալով բանակին՝ Անդրանիկ Քոչարյանը նշեց, որ մենք պատերազմը չենք ավարտել, և մոբիլիզացիոն ռեսուրսի խնդիրը լուծված չէ:
«Աշխարհը անհանգիստ է, և Հայաստանը գրավիչ է դարձել՝ նույնիսկ պատերազմի վտանգի տակ գտնվող Հայաստանը»,- ասաց նա և նշեց, որ Հայաստան եկողների թվերը բարձր են, և նույնիսկ շատ են երկքաղաքացիություն ստանալու համար դիմողները:
