Բուչայում սպանությունները կներառվեն Եվրոպայում կատրարված ոճրագործությունների ցանկում. ԵՄ

Եվրամիությունը հայտարարել է, որ «խստորեն դատապարտում է Ռուսաստանի զինված ուժերի կողմից ուկրաինական մի շարք քաղաքներում կատարված վայրագությունները»: Այս մասին ասվում է ԵՄ բարձրագույն քաղաքական մարմնի՝ Եվրոպական խորհրդի կայքում հրապարակված հայտարարության մեջ։

«Քաղաքացիական բնակչության շրջանում մեծ թվով զոհերի և վիրավորների, ինչպես նաև քաղաքացիական ենթակառուցվածքների ոչնչացման ապացույցները ցույց են տալիս ագրեսիայի դաժան պատերազմի իրական դեմքը, որը Ռուսաստանը վարում է Ուկրաինայի և նրա ժողովրդի դեմ։ Բուչա քաղաքում և Ուկրաինայի այլ քաղաքներում տեղի ունեցած ջարդերը կներառվեն եվրոպական հողի վրա կատարված ոճրագործությունների ցանկում»,- ասված է հայտարարության մեջ։

Եվրախորհուրդը կարծում է, որ Ռուսաստանի իշխանությունները «պատասխանատու են այն վայրագությունների համար, որոնք կատարվել են այն ժամանակ, երբ նրանք վերահսկում էին տարածքը»։ ԵՄ-ն հավելել է, որ ռազմական հանցագործությունների և այլ հանցագործությունների համար պատասխանատուները, ինչպես նաև պետական ​​պաշտոնյաներն ու զինվորական ղեկավարները «կենթարկվեն պատասխանատվության»:

Հայտարարության հեղինակները նաեւ նշել են, որ իրենք աջակցում են ռազմական հանցագործությունների հետաքննությանը, որը վարում է Միջազգային քրեական դատարանի դատախազը։ ԵՄ-ն նաև աջակցում է Ուկրաինայի գլխավոր դատախազությանը ռազմական հանցագործությունների վերաբերյալ ապացույցներ հավաքելու և պահպանելու հարցում:

Կիևի շրջանի Բուչայից ռուսական զորքերի դուրսբերումից հետո քաղաքում տասնյակ զոհված խաղաղ բնակիչների դիեր են հայտնաբերվել։ Բուչայից լուսանկարներ և տեսանյութեր հրապարակել են անկախ լրագրողները։ Կիևի իշխանությունները ռուս զինվորականներին մեղադրել են Բուչայում սպանությունների մեջ։ ՌԴ պաշտպանության նախարարությունը հերքում է իր առնչությունը՝ մահացածների լուսանկարների ու տեսանյութերի հրապարակումն անվանելով «բեմադրություն»:

Աղբյուրը՝ Meduza-ի։