ՌԴ ԱԳՆ պաշտոնական ներկայացուցիչ Մարիա Զախարովան դժգոհել է, որ Բրիտանիան «անգլիական վատագույն ավանդույթի համաձայն համաձայնություն չի տվել Բուչայում ստեղծված իրավիճակի շուրջ ՄԱԿ-ի Անվտանգության խորհրդի նիստին»։ Նա հայտարարել է, որ Ռուսաստանը կրկին կպահանջի ՄԱԿ-ի Անվտանգության խորհրդի գումարում, գրում է BBC-ն։
Նախօրեին թե՛ Ուկրաինան, թե՛ Ռուսաստանը պահանջել էին հրավիրել ՄԱԿ-ի Անվտանգության խորհրդի արտակարգ նիստ՝ քննարկելու Բուչայում տեղի ունեցած իրադարձությունները։
Ուկրաինայի նախագահ Վլադիմիր Զելենսկին իր ելույթում ասել է, որ «ռուսական օկուպացիայի ժամանակ Բուչայում և այլ քաղաքներում ռազմական հանցագործությունները երեքշաբթի ՄԱԿ-ի Անվտանգության խորհրդում քննարկման առարկա կդառնան»։
Սակայն ավելի ուշ ՄԱԿ-ում Ռուսաստանի ներկայացուցչի տեղակալ Դմիտրի Պոլյանսկին Telegram-ում գրել է, որ Ռուսաստանը պահանջում է, որ այդ նիստը անցկացվի նախօրեին՝ երկուշաբթի։ Նա հանդիպման թեման որակել է որպես «ուկրաինական արմատականների սադրանք»։
