Օրերս հայտնի դարձավ, որ ՀՀ վճռաբեկ դատարանը վարույթ է ընդունել Ռոբերտ Քոչարյանի, Սեյրան Օհանյանի, Յուրի Խաչատուրովի, Արմեն Գևորգյանի վերաբերյալ ՀՀ վերաքննիչ քրեական դատարանի 2021թ. նոյեմբերի 26-ի որոշման դեմ ՀՀ գլխավոր դատախազի ներկայացրած բողոքը: Բողոքով ՀՀ գլխավոր դատախազը Վճռաբեկ դատարանին միջնորդել է դիմել Սահմանադրական դատարան՝ ՀՀ քրեական դատավարության օրենսգրքի մի քանի հոդվածների դրույթների Սահմանադրությանը համապատասխանությունը որոշելու նպատակով, ինչպես նաև բեկանել գործով նշված անձանց նկատմամբ քրեական հետապնդումը դադարեցնելու և քրեական գործի մասը կարճելու վերաբերյալ Առաջին ատյանի, Վերաքննիչ դատարանների որոշումները ու քրեական գործն ուղարկել ստորադաս դատարան՝ նոր քննության:
«Մարտի 1»-ի զոհերից Գոռ Քլոյանի հայրը՝ Սարգիս Քլոյանը նշել է. «Վճռաբեկ դատարանը ընդամենը վարույթ է ընդունել ՍԴ դիմելու դատախազության միջնորդությունը, իսկ ՍԴ-ն ես արդեն գիտեմ՝ ինչ որոշում կկայացնի: Եթե ՍԴ-ն չճանաչի հակասահմանադրական, ես Վճռաբեկ դատարանից ակնկալիքներ կունենամ: Բայց ես չեմ հավատում Սահմանադրական դատարանին: Թող միանգամից ուղարկեն առաջին ատյան գործը քննելու: Մենք տեսել ենք, որ արդեն մի անգամ դիմել են Սահմանադրական դատարան, որը հակասահմանադրական է ճանաչել քրեական օրենսգրքի 300.1 հոդվածը: Հիմա նորից ուղարկում են ՍԴ 309-րդֆ հոդվածի մասով: Բնական է, որ ՍԴ-ն դա էլ կճանաչի հակասահմանադրական, եւ այդպես վաղեմության ժամկետը կլրանա, ամեն ինչ կվերջանա, «Մարտի 1»-ի գործը կփակվի: Մենք մեկ տարի ժամանակ ունենք»:
«Առաջին լրատվական»-ի հարցին, թե որեւէ ակնկալիք ունի՞, որ «Մարտի 1»-ի գործը տեղից կշարժվի, Քլոյանը պատասխանեց. «Ես մի փոքր հույս ունեմ, եթե Ռոբերտ Քոչարյանին ինչ-որ մի հոդվածով դատեն, նա նստի, ես կհամարեմ, որ «Մարտի 1»-ի էջը ամբողջովին բացահայտված է: Իսկ թե ով է կրակել, նրանք հրաման են կատարել, սպանել է Ռոբերտ Քոչարյանը: Մենակ Քոչարյանը դատվի, դա մեզ համար բավական է: Ես մի քիչ հույս ունեմ Արմեն Գեւորգյանի եւ Քոչարյանի կաշառքի գործով, որ նա դրանով դատվի: Մեկ տարի է մնացել, եթե մեկ տարում Քոչարյանը չդատվեց, ամեն ինչ վերջանում է: Դատարանը անընդհատ ձգձգում է, միջնորդություններ են անում, մի օր Քոչարյանն է հիվանդանում: Էդպես էդ մեկ տարին կլրանա»,-զրուցել է ասաց նա:
«Մարտի 1»-ի զոհերից Արմեն Ֆարմանյանի հայրը՝ Վաչագան Ֆարմանյանը նույն խնդրի առնչությամբ նշեց. «Ես հիմա ո՞նց լավ բան ակնկալեմ, նորից ինքս ինձ խաբե՞մ: 4 տարի խաբվեցինք: Այս անգամ էլ խոսքը 309-րդ հոդվածի սահմանադրականության մասին է: Մենք չգիտենք՝ ոնց կլինի, ոնց որ Աստծո հույսին թողնենք: Դա նման է նրան, որ մարդուն վիրահատում են, սպասում ենք տեսնենք՝ լավ կլինի, թե վատ կլինի:
Իհարկե, մենք հասկանում ենք պետության վիճակը՝ կորոնավիրուս, պատերազմ, հիմա նորից կարող է իրավիճակը լարի: Իմ որդիներն էլ են հիմա նույն դիրքերում: Այդքանից հետո ի՞նչ անենք, գնանք, տանք սպանե՞նք: Հիմա էլ նորից տանում են վճռաբեկ, էդ դատավորներն էլ իրենց նշանակածն է»։
