Հայաստանում էլեկտրաէներգիայի վաճառքի ոլորտը ազատականացված է, ստեղծվում է մրցակցային միջավայր, արդեն 6 լիցենզավորված ընկերություն կարող է գտնել սպառողներ և առանց կարգավորվող գների վաճառել էլեկտրաէներգիա: Այս մասին լրագրողների հետ զրույցում ասել է Հանրային ծառայությունները կարգավորող հանձնաժողովի նախագահ Գարեգին Բաղրամյանը:
Բաղրամյանը նշեց՝ փետրվարի 1-ից արդեն գործարկվել է էլեկտրաէներգիայի առևտրի իրականացման էլեկտրոնային հարթակը, որը հնարավորություն է տալիս շուկայում, ըստ գործող կանոնների, որոշակի ազատականացում ունենալ: Սպառողը մատակարարին ընտրելու հնարավորություն ունի:
«Արդեն ունենք առաջին «ծիծեռնակները», 1, թե 2 սպառող արդեն դուրս են եկել Հայաստանի էլեկտրական ցանցերի կարգավորման տիրույթից: Այսինքն՝ 1 սպառող ընտրել է մատակարար և իրենից է գնում էլեկտրաէներգիա՝ չկարգավորվող գներով, շուկայի կանոններով, ևս մեկ սպառող ստացել է որակավորված սպառողի կարգավիճակ և ինքնուրույն մասնակցում է իր էլեկտրաէներգիայի ձեռքբերմանը այդ էլեկտրոնային հարթակում»,-ասաց Բաղրամյանը:
Այնուհետև հանձնաժողովի նախագահը բացատրեց՝ որակավորված սպառողը շուկայում ինքնուրույն է գտնում իր էլեկտրաէներգիան, որոշակի կայանների հետ պայմանագիր է կնքում և իրականացնում առևտուր, ինքն էլ իր հաշվեկշռումն է իրականացնում շուկայում:
Այն փոքր հիդրոէլեկտրակայանները, որոնց օրենքով տրված երաշխիքային ժամկետը սպառվել է, հնարավորություն ունեն շուկայում էլեկտրաէներգիա վաճառելու՝ պայմանագրային գնով:
Հայաստանի էլեկտրական ցանցերը երկու ֆունկցիա է իրականացնում՝ բաշխում և վաճառք: Բաշխման ծառայությունը բացառիկ է: «Վաճառքն այսօր միանշանակ արդեն ազատականացված է: Ունենք շուրջ 6 լիցենզավորված ընկերություն՝ մատակարարներ, որոնք առանց կարգավորվող գների կարող են գտնել սպառողներ և վաճառել էլեկտրաէներգիա՝ պայմանագրային գներով»,-ընդգծեց Բաղրամյանը՝ հավելելով, որ հիմա վաճառքի ոլորտում մրցակցություն է ստեղծվում, մատակարարները կարող են մրցել և սպառողների խումբ ձևավորել:
