Կոտայքի մարզպետ Ահարոն Սահակյանն այսօր ընդունել է Հայաստանի Հանրապետությունում Ֆրանսիայի արտակարգ և լիազոր դեսպան Անն Լույոյին։ Հայտնում է Կոտայքի մարզպետարանը։ Ողջունելով դեսպանին և դեսպանության ներկայացուցիչներին Կոտայքի մարզ կատարած այցի համար՝ մարզպետը կարևորել է երկու երկրների միջև առկա բարեկամական ամուր կապը և շնորհակալություն հայտնել Հայաստանի համար ծանր ժամանակահատվածում բարեկամ Ֆրանսիայի կողմից ցուցաբերված շարունակական աջակցության և վերաբերմունքի համար:
Զրուցակիցները խոսել են մարզի զարգացման ներկա վիճակից, անդրադարձել զբոսաշրջության, մշակույթի, գյուղատնտեսության, ինչպես նաև տնտեսական ոլորտներին: Մարզպետը դեսպանի և դեսպանության պատվիրակության հետ նաև այցելել է Հրազդանի Վիլյամ Սարոյանի անվան թիվ 11 հիմնական դպրոց, որտեղ ֆրանսերեն լեզվի խորացված ուսուցում է իրականացվում և ներկա գտնվել ֆրանսերենի յուրօրինակ միջոցառման. աշակերտներն առիթ են ունեցել շփվելու դեսպանի հետ նաև ֆրանսերենով:
