Նիդեռլանդների մաքսային մարմիններն արգելել են ռուսներին պատկանող 14 զբոսանավերի դուրս գալ երկրից, հայտարարել է Նիդեռլանդների արտաքին գործերի նախարար Վոպկե Հոկստրան։ Երկու զբոսանավ գտնվում է տեխնիկական սպասարկման փուլում, ևս 12-ը կառուցման փուլում են։ Դրանց թվում կա ավելի քան 35 մ երկարությամբ զբոսանավ, որի ենթադրյալ տիրոջ անունը չի նշվում։ Ռուսաստանի դեմ սահմանված պատժամիջոցների պատճառով նավերը չեն կարող լքել Նիդեռլանդները կամ հանձնվել դրանց տերերին։
Նիդեռլանդների մաքսային ծառայությունը նաև շարունակում է զբոսանավերի ևս 15 արտադրողների և հինգ վաճառողների ստուգումները։ «Մենք նկատեցինք, որ Նիդեռլանդների նավաշինարանները լիովին համագործակցում են, չնայած այն հանգամանքին, որ պատժամիջոցները լրջորեն ազդել են նրանց գործունեության վրա», – ասել է մաքսատան գլխավոր տնօրեն Նանետ վան Շելվենը (մեջբերում է ՏԱՍՍ-ը)։
Նոր հակառուսական պատժամիջոցներ են սահմանվել՝ ի պատասխան փետրվարի 24-ին Ուկրաինայում Վլադիմիր Պուտինի հայտարարած ռազմական գործողության։ Պատժամիջոցների շրջանակներում Նիդեռլանդները սառեցրել է 516 միլիոն եվրո արժողությամբ ռուսական ակտիվները, Իտալիայում 900 միլիոն եվրո արժողությամբ ռուսների ունեցվածքը կալանք է դրվել, իսկ Գերմանիայում մոտ 96 միլիոն եվրո արգելափակվել է ռուսական հաշիվների վրա։
Աղբյուրը՝ kommersant.ru:
