Ռուսաստանի Պետական դուման երրորդ և վերջին ընթերցմամբ ընդունել է օրենք, որով տուգանքներ են սահմանվում նացիստական Գերմանիան և Խորհրդային Միությունը նույնականացնելու համար:
Նոր օրենքով տուգանք է նախատեսվում նացիստական Գերմանիայի նկատմամբ հաղթանակում խորհրդային ժողովրդի վճռական դերը և նացիզմից Եվրոպայի երկրների ազատարգման գործում ԽՍՀՄ մարդասիրական առաքելությունը հերքելու համար:
Այդ պահանջների խախտումը հանրային ելույթում, մամուլում, այդ թվում` համացանցում տեղադրված տեղեկություններում, ֆիզիկական անձանց համար նախատեսում է մինչև 2 հազար ռուբլու տուգանք կամ 15 օրվա կալանավորում: Խախտումը կրկնելու դեպքում տուգանքի գումարը կհասնի 5 հազար ռուբլու:
Իրավաբանական անձանց համար տուգանքը կլինի մինչև 50 հազար ռուբլի: Խախտումը կրկնելու դեպքում իրավաբանական անձի գործունեությունը կսառեցվի մինչև 90 օր ժամկետով:
Օրինագիծը հեղինակել են խորհրդարանի ստորին պալատի՝ Պետական դումայի «Եդինայա Ռոսիյա» կուսակցության խմբակցության անդամներ Ելենա Յամպոլսկայան և Ալեքսանդր Ժուկովը և վերին պալատի՝ Դաշնային խորհրդի անդամներ Ալեքսեյ Պուշկովն ու Օլգա Կովիտիդին:
«Նացիստական Գերմանիայի նկատմամբ հաղթանակում Խորհրդային Միության որոշիչ դերը հերքելու արգելքի մասին» օրենքը նախագահ Վլադիմիր Պուտինը ստորագրել է 2021 թվականի հուլիսի 1-ին, սակայն այդ օրենքում չի նշվել, թե ինչ պատիժ է սահմանվելու խախտումների դեպքում:
