Այսօր կառավարությունում մինչև օրակարգին անցնելը ՀՀ վարչապետ Նիկոլ Փաշինյանն անդրադարձավ Եվրոպական խորհրդի նախագահ Շառլ Միշելի միջնորդությամբ Բրյուսելում տեղի ունեցած Հայաստանի և Ադրբեջանի առաջնորդների հանդիպմանը:
«Երկու հարցի վերաբերյալ որոշում է կայացվել»,-ասաց նա և նշեց, որ առաջինը՝ երկու երկրների արտաքին գործերի նախարարներին հանձնարարվել է սկսել ապագա խաղաղության պայմանագրի նախապատրաստական աշխատանքները և այս ուղղությամբ ձեռնարկել բանակցություններ և շփումներ:
Նա նշեց, որ սա նշանակում է, որ խաղաղության պայմանագրի վերաբերյալ Հայաստանի և Ադրբեջանի ներկայացրած սկզբունքները և հարցերը իմի բերվեն և հասցեագրվեն: Նա հիշերցրեց, որ Ադրբեջանի ներկայացրած հինգ կետանոց առաջարկներում արդեն հայտարարել են, որ անընդունելի ոչինչ չկա: «Բայց չեն ամբողջացնում խաղաության օրակարգի հարցերը և մեզ համար սկզբունքային նշանակություն ունի ԼՂ ժողովրդի անվտանգության երաշխիքները, ԼՂ վերջնական կարգավիճակի ճշգրտումը: Այս հարցերը ընդգրկված են խաղաղության օրակարգի վերաբերյալ մեր պատասխաններում և պետք է դառնան բանակցությունների առարկա»,-ասաց նա:
Վարչապետն ասաց, որ ինչպես նախկինում, այնպես էլ հիմա՝ կարևոր են համարում ԵԱՀԿ Մինսկի խմբի ներգրավվածությունը: Նա նշեց, որ թեև անդրադարձ եղել է անվտանգային միջավայրի վատթարացմանը, Փառուխի դեպքերին, բայց դրանք չեն հանգեցրել իրավիճակի միասնական գնահատականի: Նա նկատեց, որ այդ հարցում ավելի շատ ակնկալիքներ ունեն ՌԴ-ից: Նա հույս հայտնեց, որ խաղաղպահները միջոնցեր կձեռնարկեն իրենց պատասխանատվության գոտուց ադրբեջանական ստորաբաժանումների դուրս բերումը ապահովելու համար:
Անդրադառնալով երկրորդ որոշմանը նա նշեց, որ պայմանավորվել են մինչև ապրիլի վերջ Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով ստեղծել:
«Հայաստանի Հանրապետության տարածքներ կան, որոնք գտնվում են Ադրբեջանի վերահսկողության ներքո, կան Ադրբեջանի տարածքներ, որոնք Հայաստանի վերահսկողության ներքո են և այս հարցերը պետք է լուծվեն»,-ասաց նա և նշեց, որ տարածաշրջանային կոմունիկացիաների բացման հարցին ևս անդրադարձ է եղել, որի շուրջ արձանագրել են որոշակի տարընթերցումներ:
Հումանիտար հարցերի վերաբերյալ նա ասաց, որ Եվրոպական խորհրդի նախագահը կարևորել է գերեվարված բոլոր անձանց ազատ արձակելը և անհետ կորածների հարցի վերաբերյալ ևս անդրադարձ է եղել: Նիկոլ Փաշինյանը հայտնեց, որ Արցախն երկու պատերազմներից հետո 985 գտնվելու վայրը անհայտ մարդ ունենք, որից 208-ը՝ 44 օրյա պատերազմից:
«Մենք հետևողականորեն շարունակելու ենք առաջ տանել մեր երկրի և տարածաշրջանի համար խաղաղ զարգացման դարաշրջան բացելու մեր օրակարգը և պետք է առավելագույնն անենք, որ այս օրակարգը դառնա իրականություն: Ցավոք դա միայն մեզանից չէ կախված, բայց մենք մեր աշխատանքի մասը պետք է հետևողականորեն իրականացնենք»,-ասաց նա:
