Այսօր Արարատ Միրզոյանի հետ բանակցությունների բաց հատվածը սկսելիս Սերգեյ Լավրովն ընդգծել է, որ ռուսական կողմը մանդատի համաձայն շարունակելու է ապահովել ռուս խաղաղապահաների գործունեությունը Լեռնային Ղարաբաղում։
«Ղարաբաղյան կարգավորման բարձր մակարդակի պայմանավորվածության երեք փաթեթ կա։ Խոսքը 2020-ի նոյեմբերի 9-ի, և 2021-ի հունվարի և նոյեմբերի պայմանավորվածությունների մասին է։ Եվ մենք կշարունակենք այդ պայմանավորվածությունների կատարման ապահովումը՝ ներառյալ Լեռնային Ղարաբաղում ռուս խաղաղապահների գործունեության ապահովումը մանդատի համաձայն», – ասել է Լավրովը։
Ռուսաստանի արտգործնախարարության ընդունելությունների տանն ուշացումով մեկնարկել է Ռուսաստանի և Հայաստանի արտգործնախարարների հանդիպումը, որի ընթացքում ռուսական կողմը հավանաբար ակնկալում է ստանալ երկու օր առաջ Բրյուսելում եվրոպացիների նախաձեռնած Փաշինյան – Ալիև ավելի քան չորս ժամ տևած բանակցությունների մանրամասները։
Բրյուսելում Եվրոպական խորհրդի նախագահ Շառլ Միշելի միջնորդությամբ այդ բանակցությունների արդյունքները թերևս շրջադարձային են հետպատերազմյան շրջանում, քանի որ հստակ նշվել է սահմանազատման երկողմ հանձնաժողովի ստեղծման ժամկետը և հայտարարվել է․ – «Նիկոլ Փաշինյանն ու Իլհամ Ալիևը նաև ցանկություն են հայտնել արագորեն առաջ շարժվել խաղաղության պայմանագիր կնքելու ուղղությամբ և հանձնարարել են իրենց արտգործնախարարներին նախապատրաստել խաղաղության ապագա պայմանագիրը, որը անդրադառնալու է բոլոր անհրաժեշտ հարցերին»։
Աղբյուրը՝ Azatutyun.am:
