Այսօր Լյուքսեմբուրգում ԵՄ ընդարձակման և հարևանության գծով հանձնակատար Օլիվեր Վարհեյին Վրաստանի նորանշանակ արտգործնախարար Իլյա Դարչիաշվիլիին է հանձնել կառույցի կազմած պաշտոնական հարցաշարը։ Այդ փաստաթղթի հիման վրա Եվրահանձնաժողովը առաջիկայում պետք է հատուկ զեկույց կազմի՝ նվիրված Վրաստանի ԵՄ անդամակցության հավանականությանն ու այդ երկրին թեկնածուի կարգավիճակի տրամադրման հեռանկարներին։
«Վրաստանի եվրոպական ընտրությունը անդառնալի է։ Մեր երկիրը վճռորոշ փուլ է մուտք գործում, և մենք կանենք ամեն ինչ, որպեսզի հարցաշարը լրացվի և վերադարձվի ԵՄ գործող բոլոր ընթացակարգերին համապատասխան», – այսօր Լյուքսեմբուրգում հայտարարել է Վրաստանի արտգործնախարարը։
Վրաստանը Մոլդովայի հետ միասին Եվրամիությանն անդամակցելու պաշտոնական դիմում էր ներկայացրել մարտ ամսին՝ ռուս-ուկրաինական պատերազմի մեկնարկից մի քանի շաբաթ հետո:
Աղբյուրը՝ Azatutyun.am:
