Այսօր քաղաքացիներն իրենց բուքմեյքերական հաշիվները կարող են լիցքավորել երեք եղանակով՝ կանխիկ, բանկային հաշիվներից եւ էլեկտրոնային դրամապանակներից: Մեր նախագծով առաջարկվում է արգելել կանխիկով եւ էլեկտրոնային դրամապանակներից վճարումները»,-Ֆինանսավարկային եւ բյուջետային հարցերի մշտական հանձնաժողովի ապրիլի 11-ի նիստում հայտնել է «Քաղաքացիական պայմանագիր» խմբակցության պատգամավոր, հանձնաժողովի նախագահ Գեւորգ Պապոյանը՝ ներկայացնելով իր եւ Ծովինար Վարդանյանի հեղինակած «Շահումով խաղերի, ինտերնետ շահումով խաղերի եւ խաղատների մասին» օրենքում եւ հարակից օրենքներում փոփոխությունների նախագիծը:
Այս մասին տեղեկացնում են ՀՀ ազգային ժողովից:
«Օրենսդրական փոփոխությունների նպատակն է խաղային բնագավառում ապահովել առավելագույն թափանցիկություն, պաշտպանել սոցիալապես անապահով խավերի շահերը եւ խաղամոլությամբ տարված մարդկանց համար խաղադրույք կատարելու լրացուցիչ խոչընդոտներ սահմանելը»,-նշել է նա:
Հիմնական զեկուցող Գեւորգ Պապոյանը նշել է, որ հասարակության մի զգալի զանգված, հիմնականում սոցիալական խնդիրներ ունեցողները, սկսել է օգտվել համացանցի միջոցով իրականացվող շահումով խաղերից:
Պաշտոնական վիճակագրությամբ՝ 2018թ. խաղացողների կողմից գնվել է 333 մլրդ դրամի միավոր խաղ, 2019թ. այդ գումարն ավելացել է ավելի քան 3.3 անգամ՝ հասնելով 1.115 մլրդ դրամի, իսկ 2020թ. միայն առաջին 10 ամիսներին աjս թիվը հասել է 1.548 մլրդ դրամի: Ըստ որոշ գնահատականների՝ 2021թ. այս թիվը գերազանցել է 2 տրիլիոն դրամը:
2018-2020թթ. ավելացել է նաեւ խաղացողների թիվը գրեթե 2.5 անգամ՝ 18093-ից հասնելով 44082-ի: Կազմակերպիչների կողմից գեներացված գումարներն առնվազն հնգապատկվել են՝ կազմելով ՀՆԱ-ի շուրջ 32 տոկոսը:
Օրենսդրական փաթեթի հեղինակների առաջարկությամբ՝ շահումով խաղերի, ինտերնետ շահումով խաղերի, վիճակախաղերի դեպքում շահումի փոխանցումը, տոտալիզատորների մասնակիցների հաշիվներին դրամական միջոցների մուտքագրումը եւ ելքագրումը, շահումների տրամադրումն իրականացվում են միայն անկանխիկ եղանակով:
Գեւորգ Պապոյանի հավաստմամբ՝ արգելվում է տոտալիզատորի, շահումով խաղերի կազմակերպիչների եւ նմանատիպ այլ սուբյեկտների հաշիվներին դրամական միջոցներ մուտքագրել եւ ելքագրել կանխիկ եղանակով, իսկ 6 ամիս հետո ուժի մեջ մտնող կարգավորմամբ՝ բուքմեյքերական հաշիվների լիցքավորումը հնարավոր է լինելու բացառապես բանկային հաշիվների միջոցով:
Անկանխիկ մուտքագրում է համարվում այն դեպքը, երբ փողը մուտքագրվում է վիճակախաղի կամ շահումով խաղի կազմակերպչի բանկային հաշվին: Նշվել է նաեւ, որ շահումը պետք է փոխանցվի այն հաշվին, որից կատարվել է գումարի մուտքագրումը՝ խաղալու նպատակով:
Մշտական հանձնաժողովի նախագահը նշել է, որ կարգավորումը բխում է պետության կողմից իրականացվող անկանխիկ դրամաշրջանառության զարգացման եւ խաղամոլության դեմ պայքարի քաղաքականություններից:
ՀՀ ֆինանսների նախարարի տեղակալ Արմեն Հայրապետյանը նշել է, որ Կառավարության եզրակացությունն օրենսդրական փաթեթի վերաբերյալ դրական է: Գործադիրը ներկայացրել էր բովանդակային եւ խմբագրական բնույթի առաջարկներ, որոնք քննարկման եւ քվեարկության արդյունքում ընդունվել են:
Մտքերի փոխանակությանը մասնակցած պատգամավորները հիմնականում շեշտադրել են խաղամոլության դեմ պայքարի անհրաժեշտությունը, ընդգծել օրենսդիր եւ գործադիր իշխանությունների նպատակային ջանքերն այդ ուղղությամբ: Նշվել է նաեւ, որ նախագծերի փաթեթը կանխարգելող գործիք է խաղամոլությամբ տառապողների նկատմամբ:
Քննարկման ընթացքում անդրադարձ է եղել նաեւ նոր հարկման համակարգի ստեղծման ու ներդրման խնդիրներին: Առաջիկայում կսկսվեն այդ առնչությամբ քննարկումները:
Օրենսդրական փաթեթի լրամշակված տարբերակը դրվել է քվեարկության եւ ստացել դրական եզրակացություն:
