Երբ անփառունակությունը դառնում է ճակատագիր, երբ տխմարաբանությունը դառնում է ամենօրյա, հանապազօրյա աշխատանք, պաշտպանության նախկին նախարարները ստիպված են լինում Արցախի դրոշով գալ և այս դրոշը դնել Ազգային ժողովի ամբիոնում: Այս մասին այսօր Ազգային ժողովում իր ելույթում ասաց «Քաղաքացիական պայմանագիր» խմբակցությունից Վահագն Ալեքսանյանը՝ ի պատասխան խորհրդարանական ընդդիմության՝ նիստերը բոյկոտելուն և Արցախի դրոշը Ազգային ժողով բերելուն:
Նա նշեց, որ այս դրոշը ճիշտ տեղեր դնելու և դրոշի ամրությունը ապահովելու փոխարեն՝ զբաղված են եղել թալանով և եկել են Ազգային ժողով պոպուլիստական ելույթներ են ունենում:
«Արթուր Ղազինյանը, վստահ եմ, հպարտ կեցվածքով այստեղից դուրս է եկել, նստել իր 300 հազար դոլարանոց մեքենան ու գնացել է Արցախը փրկելու ու պաշտպանելու, նույնը երևի Սեյրան Օհանյանը և մնացածը, էլ չեմ խոսում Սերժ Սարգսյանի մասին: Ես վստահ եմ, որ Հանրապետական կուսակցությունը եթե այստեղ տեղադրեր Բադեն-Բադեն քաղաքի խորհրդանիշը, իմ կարծիքով, Սերժ Սարգսյանը շատ ավելի հաճույքով կնայեր այս նիստը»,-ասաց նա և կոչ արեց քաղաքացիներին չտրվել դատարկ պոպուլիզմին։
