Դիմում եմ ՀՀ ժողովրդին, տեղեկացնում եմ, որ այն գործողությունները, որը որ իրականացնում է աջ թևի վրա նստած քաղաքական գործիչների բազմությունը հղի է լուրջ վտանգներով Հայաստանի Հանրապետության համար: Այս մասին այսօր Ազգային ժողովում իր ելույթում ասաց «Քաղաքացիական պայմանագիր» խմբակցության անդամ Գուրգեն Արսենյանը՝ անդրադառնալով խորհրդարանական ընդդիմությանը՝ քառօրյային չմասնակցելու և Արցախ մեկնելու հայտարարությանը:
Ըստ նրա՝ ընդդիմության քայլերը՝ ՀՀ իշխանությունների ջանքերը՝ խաղաղության օրակարգ ամրապնդելուն ուղղված տորպեդահարման ակտիվ փորձ է, որը որ իրականացվում է ադրբեջանական համապատասխան ծառայությունների ուժերի հետ համագործակցությունը ապահովելու նպատակով:
«Պահանջում եմ ՀՀ իշխանությունից և վարչապետ Նիկոլ Փաշինյանից՝ վերանայել այն սկզբունքները և այն աշխատանքային գործիքակազմը, որը իրականացվում է Հայաստանի և Ղարաբաղի հանրապետությունների մեջ իրականացվող գործընթացներում, պահանջում եմ նաև որպեսզի ՀՀ քաղաքական ղեկավարությունը սթափեցնի Ղարաբաղի քաղաքական ղեկավարությանը՝ իր կողմից իրականացվող անհեռատես քաղաքականության հետևանքների մասին, որովհետև եթե ՀՀ-ն ձախողի այս գործընթացը Հայաստանի Հանրապետության և որպես երկիր լինելն է դվրում վտանգի տակ: Պահանջում եմ՝ մեր քաղաքական թիմից կոշտացնել դիրքորոշումները, ԱԱԾ-ից հասկանալ ինչ են անում և ուր են տանում այս գործողությունները, որովհետև մենք պատասխանատու ենք ՀՀ ժողովրդի առջև»,-ասաց նա:
Գուրգեն Արսենյանը նշեց, որ քաղաքացիները իրենց տվել են մանդատ ու ասել՝ գնացեք ու ապահովեք խաղաղություն: «Մենք չպետք է թույլ տանք, որևէ արկածախնդիր քաղաքական թիմին՝ խաղալ ՀՀ անվտանգության հետ, մենք չպետք է թույլ տանք, որ մեր ժողովրդին նոր սպանդի տանելու հնարավորություն ընձեռվի: Պահանջում եմ ու սթափության կոչ եմ անում ՀՀ քաղաքական ղեկավարությանը, այդ թվում նաև մեզ»,-ասաց նա:
