«Միջխորհրդարանական հարթակներում, որտեղ ընդդիմությունը պետք է գա եւ Արցախի ու արցախցու իրավունքներն ու շահերը պաշտպանի, ասել է թե՝ Արցախի դրոշը այնտեղ վեր հանի, ընդդիմադիրները չեն գալիս, ընդդեմ ադրբեջանցիների չեն գալիս եւ չեն խոսում, ժողովրդի տված մանդատը չեն իրագործում, բոյկոտում են ինչ-որ մարդկանց հրահանգներով, իսկ հետո գալիս են եւ Արցախի դրոշը կարծես ընդդեմ մեզ կամ ինչ-որ մեկի տեղադրում են ՀՀ-ում` այնտեղ, որտեղ դրա կարիքը չկա»,- այս մասին այսօր` մարտի 12-ին կայացած ՀՀ ԱԺ ութերորդ գումարման երրորդ նստաշրջանի հերթական նիստի ընթացքում ասաց «Քաղաքացիական պայմանագիր» խմբակցության պատգամավոր Հայկ Կոնջորյանը` անդրադառնալով խորհրդարանական ընդդիմության՝ քառօրյայի նիստը բոյկոտելուն եւ ընդդիմադիրների կողմից Արցախի դրոշը ԱԺ-ում փակցնելուն:
Անդրադառնալով Սեյրան Օհանյանի կողմից ՀՀ ԱԺ ամբիոնին փակցված Արցախի դրոշին՝ Կոնջորյանը հիշեցրեց խորհրդարանական ընտրություններից հետո Օհանյանի հնչեցրած արտահայտությունը.
«Ես հիշում եմ, որ խորհրդարանական ընտրություններից հետո Սեյրան Օհանյանը արել էր այսպիսի մի արտահայտություն, որի միտքը հետեւյալն էր, որ խորհրդարան անցնելն իրենց համար խրամատ է եւ իրենք այդ խրամատում պիտի գան եւ պայքարեն: Նրանք եկան ԱԺ եւ խրամատավորվեցին այս նստարաններին, զբաղվում էին շշանետումներով, ծեծկռուքներ էին հրահրում, փորձում էին ամեն կերպ արժեզրկել խորհրդարանը եւ կարծես թե գուցե հմարում են, որ իրենց առջեւ դրված խնդիրը այստեղի խրամատում լուծել են, եւ հիմա մեկնում են Արցախ, հավանաբար նորից խրամատավորվելու եւ ամենայն հավանականությամբ նորից խրամատավորվելու արդեն ընդդեմ ՀՀ իշխանությունների եւ ընդդեմ ՀՀ ժողովրդի, այլ կերպ պարզապես ես չեմ կարող դա մեկնաբանել»:
Կոնջորյանը կոչ արեց Արցախի դրոշը տեղադրել մասնավորապես այնտեղ, որտեղ առավելագույնս կա կարիքը՝ հանրայնացնելու Արցախի եւ մեր հայրենակիցների իրավունքների եւ ազատությունների հարցը.
«Արցախի դրոշը եւ Արցախը բոլորիս մտքերում եւ սրտերում է, իսկ մեր ժողովուրդը հանուն Արցախի զոհել է իր լավագույն զավակներին, եւ Արցախի դրոշը տեղադրելը, Արցախի շահերը պաշտպանելը լավագույնս պետք է ընդդիմությունը կատարի այնտեղ, որտեղ առավելագույնս կա կարիքը՝ հանրայնացնելու Արցախի եւ մեր հայրենակիցների իրավունքների եւ ազատությունների հարցը»:
