«Արցախը փրկելու բազմաթիվ ժամանակներ են եղել, բայց այս կազմով հիմնականում հակառակ ուղղությամբ են եկել, ուստի Արցախի ինքնիշխանությունն ու անվտանգությունը հենց այդ ժամանակ է դրվել կասկածի տակ: Կարծում եմ, ավելի անկեղծ կլինեն այս մարդիկ, եթե իրենց իրական շեֆերը, ինչպես տարիներ առաջ եկել են Արցախից, հիմա վերադառնան Արցախ եւ իրենց կոչած հայրենանվեր գործունեությունը այնտեղ ծավալեն եւ ոչ թե Երեւանի կենտրոնից կամ իրենց շքեղ դղյակներից փրկեն Արցախը, այլ հենց Ստեփանակերտում փորձեն փրկել այն»,- այս մասին այսօր` ապրիլի 12-ին կայացած ՀՀ ԱԺ ութերորդ գումարման երրորդ նստաշրջանի հերթական նիստի ընթացքում ասաց «Քաղաքացիական պայմանագիր» խմբակցության պատգամավոր Գեւորգ Պապոյանը` անդրադառնալով խորհրդարանական ընդդիմության՝ քառօրյայի նիստը բոյկոտելուն:
Պապոյանի խոսքով, ընդդիմության ներկայացուցիչները նվազագույնը անկեղծ չեն։ Նա ընդդիմադիրների խոսքը որակեց որպես կեղծավորություն, ասելով, որ Արցախը փրկելու համար 2022 թ.-ի ապրիլ ամիսը առնվազն ճիշտ ժամանակը չէ.
«Արցախի փրկության մասին այս մարդիկ պետք է մտածեին այն ժամանակ, երբ Ադրբեջանի ռազմական բյուջեն տարեկան աճում էր մի քանի 0-ներով տոկոսներով, իսկ ՀՀ ռազմական բյուջեն աննշան տոկոսներով: Այսինքն, իրենց անձնական հարստությունը եւ Ադրբեջանի հարստությունը ուղիղ համեմատական է եղել, եւ այդ հարստացումը որեւէ առնչություն չի ունեցել տասնամյակներ շարունակ ՀՀ բանակի եւ քաղաքացիների սոցիալական ու տնտեսական վիճակի հետ, այ այդ ժամանակ էր պետք փրկել Արցախը, այլ ոչ թե թալանել Հայաստանը»:
Եզրափակելով իր ելույթը՝ Պապոյանն ասաց, որ ընդդիմադիրների իրականացրած գործողությունները որակում է հակաարցախյան, որովհետեւ այդ գործողությունների արդյունքում միանշանակ Արցախը չի կարող շահել:
