Ղարաբաղի հարցի ամենամեծ խնդիրներից մեկն այն է, որ դրա լուծման բանաձևը միայն հայկական կողմից չէ կախված. ՀՀ գործող իշխանությունն իր առաքելությունն է համարում գնալ ինչ-որ լուծումների և երկարաժամկետ խաղաղություն ապահովել Հայաստանի և տարածաշրջանի համար: Այս մասին ասաց ՀՀ վարչապետ Նիկոլ Փաշինյանն ԱԺ-ում՝ անդրադառնալով ՔՊ խմբակցության պատգամավոր Վիգեն Խաչատրյանի հարցին:
«Մենք պետք է իլյուզիաներ չունենանք: Ղարաբաղի հարցի ամենամեծ պրոբլեմներից մեկը ո՞րն է եղել և շարունակում է մնալ. որ դրա լուծումը, լուծման այս կամ այն բանաձևը միայն մեզանից չէ կախված: Ես ուզում եմ, որ մենք խորը ընկալենք այս նրբությունները: Պետականության կշիռը, քաշը, աստիճանը աստեղ է շատ կարևոր, թե քո տեսակետը ինչքանո՞վ կարող ես առաջ մղել՝ առանց վնասելու ինքդ քեզ: Այստեղ շատ կարևոր նրբություններ կան»,-ասաց Փաշինյանը՝ հավելելով, որ պետք է ի վերջո սկսել խոսել այդ թեմայով, կարողանալ պատճառահետևանքային կապերը ճիշտ և հստակ ընդգծել:
Ն․ Փաշինյանի խոսքով՝ պատմական իրողություններն էլ այնպես չէ, որ ինչ-որ կոնկրետ և տեսանելի տեղ են տանում: «Այդ պրոցեսը պետք է անընդհատ կառավարվի: Թեմայի բարդությունը սրա մեջ է»,-նշեց նա:
Ղարաբաղի հարցի բանակցային գործընթացի առանձնահատկությանն անդրադառնալով՝ վարչապետը կրկնեց՝ այն, ինչին Հայաստանը երկար բանակցությունների արդյունքում համաձայնել է, հաջորդ պահին արդեն Ադրբեջանը դրա հետ համաձայն չի եղել:
«Այս իրողություններն էլ պետք է հաշվի առնենք: Այլ բան, որ պետք է գտնենք ճիշտ բալանսը, որտեղ կարող ենք հանգել ինչ-որ լուծումների: Եվ ես կարծում եմ՝ մեր առաքելությունը այդ է՝ գնալ ինչ-որ լուծումների և երկարաժամկետ խաղաղություն ապահովել ՀՀ-ի և տարածաշրջանի համար: Բայց դա չի նշանակում, որ կա երաշխիք, որ մենք դա կարող ենք անել: Մենք դա կարող ենք չկարողանալ անել՝ ամենատարբեր պատճառներով»,-ասաց Փաշինյանը:
Իսկ, թե ի՞նչ պատճառներ կարող են լինել որևէ լուծման չհասնելու համար, Փաշինյանը ասաց. «Պատճառ 1՝ մեր ժողովուրդը կարող է ասել, որ իր համար ընդունելի չէ: Պատճառը 2՝ միջազգային կոնյուկտուրան կարող է թույլ չտալ, որ դա տեղի ունենա»:
Վարչապետն ընդգծեց՝ աշխարհակարգը փլուզվում է: Եվ այդ պարագայում ըստ նրա, կրկնակի և եռակի ջանքեր են պահանջվում փոթորիկը հաղթահարելու համար: Փաշինյանը կարևորեց մարդկանց հետ լրջագույն հաղորդակցության մեջ լինելը՝ հավելելով, որ ունեն այդ հնարավորությունը՝ խոսելու մարդկանց հետ, լսելու, կայացնելու լեգիտիմ որոշումներ:
