«Այն պահից սկսած, երբ հայտնի դարձավ, որ ԱԺ պատգամավորները չեն կարողանում Լաչինի միջանցքով մուտք գործել Լեռնային Ղարաբաղ, մենք, բնականաբար, ձեռնարկել ենք գործողություններ, կապի մեջ ենք եղել եւ ԼՂ իշխանությունների, եւ Ռուսաստանի Դաշնության իշխանությունների հետ, նշեմ, որ բավականին բարձր մակարդակով, եւ մեզ հավաստիացրել են, որ ԱԺ պատգամավորների մուտքը Արցախ չի թույլատրվում սադրանքներից զերծ մնալու նկատառումներով»,- Ազգային ժողովում կառավարության հետ հարց ու պատասխանի ժամանակ ասաց արտաքին գործերի նախարար Արարատ Միրզոյանը` պատասխանելով Վահագն Ալեքսանյանի հարցին` ԱԳՆ-ի կողմից ինչ միջոցներ են ձեռնարկվել հետագայում նման դեպքերից խուսափելու համար:
Միրզոյանը, անդրադառնալով ընդդիմադիրների ԼՂ մուտքի արգելքին իրենց դիրքորոշմանը, ասաց, որ այն արտացոլված է ԱԳՆ հայտարարության մեջ.
«Այն է՝ նոյեմբերի 9-ի եռակողմ հայտարարությամբ Լաչինի միջանցքով շարժի որեւէ սահմանափակում նախատեսված չէ, եւ ՀՀ քաղաքացիները, եւ առավել եւս պատգամավորների համար, քանի որ վերջիններս պետք է անարգել մուտք ունենան Լեռնային Ղարաբաղ»,- եզրափակեց Միրզոյանը:
