Այսօր Ազգային ժողովում Հեռուստատեսության և ռադիոյի հանձնաժողովի նախագահ Տիգրան Հակոբյանը ներկայացնում է՝ Հեռուստատեսության և ռադիոյի հանձնաժողովի 2021 թվականի մասին տարեկան հաղորդումը:
Նա նախ համեմատություն անցկացնելով 2018 թվականի տարեկան հաղորդման հետ՝ ցուցադրեց այդ թվականի և 2021 թվականի տարեկան հաղորդումների ծավալը: «Սա եղել է 2018 թվականի տարեկան հաղորդումը, որը ներկայացվել է Ազգային ժողով: 4,5 էջ և ոչ թե սա միայն հանձնաժողովի աշխատանքի արտացոլումն էր, այն հանձնաժողվի հանդեպ նաև Ազգային ժողովի վերաբերմունքն էր։ Բնական է, ոչ միայն սա ձևն էր, նաև բովանդակությունն էր, և ԱԺ-ն սրանով բավարարվում էր ու հավանություն էր տալիս, կամ չէր տալիս, ընդհանրապես նաև քննարկումներ չէին լինում»,- ասաց նա:
Հանձնաժողովի նախագահն ասաց, որ 2021 թվականը հանձնաժողովի ամենածանր, ամենապաստախանատու տարին էր: «Մեկ տարում ամենամեծ, ծավալուն աշխատանքն են իրականացրել լիցենզավորման մրցույթի առումով: Ավելի շատ վարչական վարույթներ են իրականացրել»,- ասաց նա և նշեց, որ ավելի քան նախորդ ինը տարիների ընթացքում, ունեցել են ավելի շատ դատական նիստեր և մշտադիտարկել են ավելի շատ հեռարձակողներ, քան հանձնաժողովի պատմության ամբողջ ընթացքում, և դա մեկ տարում:
«Միջազգային կառույցների, մասնագետների գնահատականները մեծամասամբ փաստում են, որ այդ ծավալների դեպքում հանձնաժողովը կատարել է բավականին օբյեկտիվ աշխատանք: «Մենք նախորդ տարի և հիմա պետք է կրկնենք, որ շատ բարձր ենք գնահատում այն իրավիճակը, որը ստեղծվել է հեռարձակող մեդիայի ոլորտում և մեր ուսումնասիրությունները, հարցումները, մեդիամասնագետների կարծիքները վկայում են այն մասին, որ իշխանությունները հավատարիմ են մնացել իրենց պարտավորություններին՝ լինել երաշխավորը խոսքի և մամուլի ազատության, և առաջին անգամ միջազգային կառույցները արձանագրել են, որ նաև հանձնաժողովը բավականին ազատ է եղել պետության և կառավարության միջամտություններից»,-ասաց նա:
