Ուկրաինայի հետաքննությունների պետական վարչությունը հայտնել է օրերս ձերբակալված ամենահայտնի ռուսամետ քաղաքական գործչին և Ռուսաստանի նախագահ Վլադիմրի Պուտինի բարեկամի համբավ ունեցող Վիկտոր Մեդվեդչուկին և նրա տիկնոջը՝ Օքսանա Մարչենկոյին պատկանող անշարժ և շարժական գույքի 154 միավոր բռնագանձելու մասին:
Մի շարք կալանքի տակ հայտնված սեփականության ցանկում են Մեդվեդչուկին և նրա կնոջը պատկանող 26 ավտոմեքենաներ, 30 հողամասեր, 23 տներ, 32 բնակարաններ, 17 կայանման հրապարակներ և մեկ զբոսանավ:
Կալանքի տակ են նաև փաստացի Մեդվեդչուկի կամ նրա կնոջ սեփականությունը հանդիսացող 25 ընկերությունների կանոնադրական դրամագլխի մասնամաժինները:
Ուկրաինայի անվտանգության ծառայության ղեկավար Իվան Բականովի փոխանցմամբ, Մեդվեդչուկը փորձել է գաղտնի ճանապարհով տեղափոխվել Մերձդնեստրի տարածք, սակայն ձերբակալվել է:
Վիկտոր Մեդվեդչուկն «Ըննդիմադիր հարթակ հանուն կյանքի» կուսակցության լիդերներից մեկն է: Այդ կուսակցությունը դավանում է բացահայտ ռուսամետ գաղափարներ:
Ըստ հավաստի տեղեկությունների, նա ունի բարեկամական կապեր Ռուսաստանի նախագահ Վլադիմիր Պուտինի հետ, ով Մեդվեդչուկի դստեր կնքահայրն է:
Ի պաշտոնե Մեդվեդչուկը դեռ համարվում է Գերագույն ռադայի պատգամավոր: Նա գտնվել է տնային կալանքի պայմաններում, քանի որ մեղադրվում է պետական դավաճանության հոդվածով:
Աղբյուրը՝ Azatutyun.am:
