ՌԴ արտաքին գործերի նախարարության պաշտոնական ներկայացուցիչ Մարիա Զախարովան պարզաբանել է Հայաստանի ԱԺ ընդդիմադիր պատգամավորների՝ ռուս խաղաղապահների կողմից Արցախ մուտքի արգելքի շուրջ ստեղծված իրավիճակը:
«Ռուսական խաղաղապահ զորախումբը (ՌԽԿ) գործում է Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի հայտարարության դրույթներին համապատասխան։ Նշված այցը նախապես համաձայնեցված չի եղել զորախմբի հրամանատարության հետ։
Մենք կարծում ենք, որ ռուս խաղաղապահների գործողությունների մասին հայտարարությունները, որոնք իբր հակասում են 2020 թվականի նոյեմբերի 9-ի հայտարարության դրույթներին, չեն համապատասխանում իրականությանը։
Մենք ակնկալում ենք, որ հաշվի առնելով ինչպես ԼՂՀ-ի պատասխանատվության գոտում, այնպես էլ հայ-ադրբեջանական սահմանի առանձին հատվածներում տեղի ունեցած միջադեպերը, երկու կողմերն էլ ձեռնպահ կմնան տարածաշրջանում իրավիճակն էլ ավելի սրող քայլերից»,-հայտարարել է Զախարովան, որի խոսքերը մեջբերված են ՌԴ ԱԳՆ պաշտոնական կայքում հրապարակված հաղորդագրության մեջ:
Հիշեցնենք, ապրիլի 12-ին ՀՀ ԱԺ «Հայաստան» խմբակցության ներկայացուցիչներին թույլ չի տրվել մտնել Արցախի Հանրապետություն:
Նշվածի կապակցությամբ մտահոգություն էր հայտնել ՀՀ ԱԳ նախարարությունը՝ հայտարարելով, որ նշված գործողությունը հակասում է 2020թ. նոյեմբերի 9-ի եռակողմ հայտարարությանը, որով նախատեսվում է Լաչինի միջանցքով Լեռնային Ղարաբաղի անխափան կապը Հայաստանի հետ:
Երեկ՝ ապրիլի 13-ին, էլ, ՀՀ վարչապետն ԱԺ-ում հայտարարել էր, որ տարակուսանքի տեղիք է տալիս այն փաստը, որ ապրիլի 12-ին Ռուսաստանի Դաշնության խաղաղապահ զորախումբը չի թույլատրել պատգամավորների մուտքը Արցախ։