Միացյալ Նահանգների արտաքին գերատեսչության մամլո խոսնակ Նեդ Փրայսն ասել է, թե Վաշինգտոնը պատրաստ է Երևանին և Բաքվին օգնել համապարփակ խաղաղություն հաստատելու գործում՝ այդ թվում ԵԱՀԿ-ի Մինսկի խմբի միջոցով:
«Միացյալ Նահանգները պատրաստ է օգնել Ադրբեջանին և Հայաստանին հասնել համապարփակ խաղաղության, այդ թվում՝ ԵԱՀԿ Մինսկի խմբի միջոցով։
Մենք ողջունեցինք ապրիլի 6-ին Բրյուսելում վարչապետ Փաշինյանի և նախագահ Ալիևի հանդիպումը՝ ներառյալ խաղաղ բանակցությունների նախապատրաստման դրական դինամիկան և սահմանների սահմանազատման երկկողմ հանձնաժողովի ձևավորումը։ Միացյալ Նահանգները պատրաստ է երկկողմանի աշխատել համախոհ գործընկերների հետ, այդ թվում՝ որպես ԵԱՀԿ Մինսկի խմբի համանախագահող երկիր, օգնելու երկրներին հասնել երկարաժամկետ համապարփակ խաղաղության։
Չեմ կարող խոսել այն մասին, թե ինչ դեր կարող է ունենալ Ռուսաստանը։ Բայց կարող եմ ասել, որ մենք պատրաստ ենք համագործակցել Հայաստանի և Ադրբեջանի հետ երկկողմ հիմունքներով և համախոհ գործընկերների հետ, այդ թվում՝ ԵԱՀԿ մեխանիզմի միջոցով»,- ճեպազրույցի ժամանակ ասել է ԱՄՆ Պետդեպարտամենտի խոսնակ Նեդ Փրայսը։
