Կառավարության որոշմամբ՝ 2022 թվականի ընթացքում ՀՀ տարածք ներմուծվող էլեկտրաշարժիչով շարժիչային տրանսպորտային միջոցների նկատմամբ սակագնային արտոնություն կկիրառվի:
Եվրասիական տնտեսական հանձնաժողովի խորհրդի որոշման համաձայն՝ Հայաստանի Հանրապետությանը 2022 թվականի համար հատկացվել է էլեկտրաշարժիչով շարժիչային տրանսպորտային միջոցների ներմուծման սակագնային քվոտա 7․0 հազ․ հատ չափաքանակով, որի շրջանակներում նախատեսվում է կիրառել ներմուծման մաքսատուրքի 0 տոկոս դրույքաչափ։
Ըստ նախագծի հիմնավորման՝ Էլեկտրաշարժիչով շարժիչային տրանսպորտային միջոցների բաշխման առաջին փուլում, 6400 հատ քանակությամբ էլեկտրամոբիլների ներմուծման մաքսատուրքի 0 տոկոս դրույքաչափի արտոնությունը տրամադրվում է ֆիզիկական և իրավաբանական անձանց կողմից ներմուծումներ իրականացնողներին։ Մնացած 600 հատ քանակությամբ էլեկտրամոբիլների մասով նախատեսվում է պահել ռեզերվ՝ անմիջապես ապրանքանշանից և դիլերական/դիստրիբյուտորական պայմանագրերի հիման վրա ներմուծումներ՝ պաշտոնական ներկայացուցիչներին ապահովագրելու նպատակով։
Նախագիծը ներկայացնող Վահան Քերոբյանը նկատեց, որ այստեղ տեխնիկական խնդիր պետք է լուծենք, որովհետև այսօր էլեկտրաէներգիա վաճառելու իրավունք ունի ընդամենը մի կազմակերպություն: «Այս որոշումով նախապատրաստում ենք օրենսդրական փոփոխություն, որպեսզի թույլ տանք էլեկտրական շարժիչների լիցքավորումը, որ ըստ էության էլեկտրաէներգիայի վաճառքը կարողանա տեղի ունենալ նաև այլ ընկերությունների կողմից»,- ասաց նա:
Վարչապետը ևս համաձայնեց, որ այդ խոչընդոտը կա, և հիմա մարդիկ լիցքավորում են տան էլեկտրաէներգիայով:
