Այս պահին համաճարակային առումով ունենք շատ բարենպաստ իրավիճակ, բայց մենք պետք է հասկականք , որ այս բարենպաստ իրավիճակը պետք է օգտագործենք պատվաստումների միջոցով հետագա հիվանդացությունները կանխարգելելու ուղղությամբ։
Այս մասին այսօր լրագրողների հետ ճեպազրույցի ժամանակ ասաց Առողջապահության նախարար Անահիտ Ավանեսյանը։
«QR կոդերի պահանջի կանոնակարգը ռեստորաններում, ժամանցի վայրերում, աշխատավայրերում առաջիկայում դեռ մնալու է ուժի մեջ»,- ասաց նախարարը։
Ըստ նրա՝ Հայաստանում առողջապահական համակարգի զարգացման առումով տարեցտարի գրանցվում է բարելավում և առաջընթաց: Թե՛ մանկական, մայրական մահացության, թե՛ կյանքի սպասվելիք միջին տևողության առումով Հայաստանը տարածաշրջանում գրավում է բավական լավ դիրքեր:
Նրա խոսքով՝ մենք զիջում ենք մեր հարևաններին այն առումով, թե ինչ ֆինանսական միջոցներ են ուղղվում պետության կողմից առողջական խնդիրների լուծման նպատակով:
«Հայաստանում առողջապահական բյուջեն կազմում է մեր ՀՆԱ-ի 1,5 տոկոսը, որը բավականին ցածր ցուցանիշ է: Մենք աշխատում ենք առողջապահական բյուջեի բարելավման առումով՝ տարեցտարի ավելացնելով այդ բյուջետային միջոցները: Չորս տարիների ընթացքում մեր բյուջեն 81 մլրդ դրամից հասել է 114 մլրդ դրամի, որը, կարող ենք ասել, շեշտակի մեծացում է, բայց, իհարկե, այն նախընտրելի չափը չէ, որը կնպաստի նաև մեր երկրին համաշխարհային ինդեքսներում ավելի բարենպաստ ցուցանիշներով ներառվելուն»,- ասաց Ավանեսյանը:
