Այսօր խորհրդարանական ճեպազրույցների ընթացքուն «Քաղաքացիական պայմանագիր» խմբակցության պատգամավոր Վահագն Ալեքսանյանը հայտնեց՝ այն թեզը, որը ՀՀԿ-ն օգտագործում է, թե Ալիևը մի անգամ ներքին լսարանի համար արած իր հայտարարության մեջ ասել է, թե փակ դռների հետևում իրեն ստիպում են ճանաչել Արցախի անկախությունը, բանակցային ոչ մի փաստաթղթում չի եղել:
«Սերժ Սարգսյանի բանակցած ոչ մի փաստաթղթում չի եղել անկախություն բառը։ Սա եկեք հստակեցնենք։ 2016 թվականի փաստաթղթով, որը ներկայացվել է համանախագահների կողմից, որը որոշ փորձագետներ անվանում են Լավրովյան պլան, ռուսական կողմը համարում է համանախագահների առաջարկ, ընդհանրապես չկա անկախություն բառը։
2016 թվականի հունվարին, երբ այդ առաջարկը ներկայացվել է Սերժ Սարգսյանին, այն իրենից ենթադրել է փուլային լուծում։ Ինչպես և մնացած փուլային լուծումները, դա իրենից ենթադրում էր հետևյալը՝ առաջին փուլում ենթադրվում էր լուծել առաջին պատերազմների հետևանքների հարցը, այն է՝ փախստականների վերադարձ, իսկ երկրորդ փուլում, որը պետք է ենթադրեր ԼՂ կարգավիճակի ճշգրտում, չկար ոչ մի հստակություն։
Չկար, օրինակ, որ հաջորդ տարի տեղի է ունենալու հանրաքվե, չկար հստակություն, թե այդ հանրաքվեն ինչ կազմով էր տեղի ունենալու։ Երբ թղթի վերնագիրը փաթեթային լուծում էր գրված, չգիտեմ Սերժ Սարգսյանն անձամբ էր խնդրել, որ այդպես գրեին, դրանից ոչինչ չէր փոխվում, ամբողջ բովանդակությունը բացառապես փուլային էր»,-ասաց նա:
Անդրադառնալով ընդդիմադիր խմբակցությունների գործողություններին ու ակցիաներին՝ Ալեքսանյանն ասաց, թե վաղուց դադարել է դրանցում տրամաբանություն փնտրել։
«Հղում պետք է անեմ վարչապետի խոսքին, երբ նա ասաց, որ մենք պետություն ենք, ախոռ չենք։ Ուզում եմ ասել, որ Հայաստանում, ցավոք, կան մարդիկ, որոնք գուցե ապահովեն իրենց նեղ ճակատի կոնսոլիդացիա՝ ընդդեմ այս արտահայտության, փորձեն ապացուցել, որ մենք ոչ թե պետություն ենք, այլ՝ ախոռ, ու այդ ամենը միայն այն պատճառով, որ իրենք հավակնեն այդ ախոռում ախոռի պետի պաշտոնը», – ասաց Ալեքսանյանը:
