Հունվարի 5-ին օպերատիվ կառավարման կենտրոնից ահազանգ էր ստացվել, որ Առինջ գյուղի էլեկտրաենթակայանից տրանսֆորմատորի յուղ էին գողացել: Այս մասին տեղեկացնում են ՀՀ ոստիկանությունից:
Դեպքի վայր մեկնած օպերատիվ խումբը պարզել էր, որ հունվարի 4-5-ը գողացել էին չշահագործվող հոսանքի կայանի յուղն ու պղնձե դետալներ՝ ընկերությանը պատճառելով մոտ 309 միլիոն դրամի վնաս:
Գողության փաստով հարուցվել էր քրեական գործ:
Ըստ ոստիկանության՝ ծավալուն հետախուզական միջոցառումներ են ձեռնարկվել: Ոստիկանության Կոտայքի բաժնի ծառայողների բացահայտման աշխատանքներին միացել են քրեական ոստիկանության գլխավոր վարչության գործընկերները։
Հետևողական միջոցառումների արդյունքում տեղեկություններ են ստացվել, որ գողությունը հնարավոր է՝ կատարած լինեն երեք տղամարդ, որոնցից մեկը՝ Նոր Խարբերդի, երկուսը՝ Երևանի բնակիչ:
Ապրիլի 11-ին քրեական ոստիկանության գլխավոր վարչության և Կոտայքի բաժնի ծառայողները համատեղ միջոցառումներով կասկածվողներին հայտնաբերել և բերման են ենթարկել Կոտայքի բաժին:
Նրանք տվել են խոստովանական բացատրություն: Պարզվել է, որ գողոնը վաճառել են Երևանի տարբեր թաղամասերում:
Բերման ենթարկված տղամարդիկ ներկայացվել են Աբովյանի քննչական բաժին:
Հանգամանքները պարզվում են:
