Ապրիլի 18-ին «Արցախյան երրորդ պատերազմում զոհված և անհայտ կորած զինծառայողների հարազատների միություն» հասարակական կազմակերպության նախաձեռնությամբ զոհվածների հարազատների համար կգործի անվճար տրանսպորտ դեպի Եռաբլուր զինվորական պանթեոն:
Այս մասին «Արցախպրես»-ի թղթակցի հետ զրույցում ասել է «Արցախյան երրորդ պատերազմում զոհված և անհայտ կորած զինծառայողների հարազատների միություն» ՀԿ նախագահ Արմեն Ասրյանը:
«Ապրիլի 18-ին՝ առավոտյան ժամը 06:00-ին, ավտոբուսները Ստեփանակերտից կշարժվեն դեպի Եռաբլուր: Արդեն իսկ հիսունից ավելի անձ դիմել է։ Նրանց կուղեկցեն մեր միության ներկայացուցիչները: Այս նախաձեռնությամբ մենք փորձում ենք ցույց տալ այդ ընտանիքներին, որ նրանք բոլորի ուշադրության կենտրոնում են:
Պետք է նշեմ, որ այս առումով դիմել ենք Կառավարությանը, նրանք մեզ աջակցում են, և երբևէ որևէ բարդություն չի առաջացել, ընդհակառակը, միշտ մեծ պատրաստակամությամբ են ընդունում նմանատիպ նախաձեռնությունները։ Իսկ բոլոր տեսակի կազմակերպչական աշխատանքները իրականացվում են միության աշխատակիցների կողմից»,-նշել է Ա. Ասրյանը:
