Ինչքանով որ հասցրի հետևել պարոն Վանեցյանի գործողություններին, նկատեցի, որ նա հեծանիվ էր վարում այնտեղ: Գնահատականը ժամանակի ընթացքում պետք է տանք, տեսնենք, թե իրադարձությունները ինչպես կզարգանան:
Այս մասին այսօր Ազգային ժողովում լրագրողների հետ զրույցում հայտարարեց «Քաղաքացիական պայմանագիր» խմբակցության պատգամավոր Վաղարշակ Հակոբյանը՝ անդրադառնալով Արթուր Վանեցյանի՝ Ազատության հրապարակում հայտարարած նստացույցին:
Պատգամավորի խոսքով՝ Հայաստանը ժողովրդավարական երկիր է, և այնտեղ ապրող քաղաքացիները ակցիաների միջոցով կարող են արտահայտել իրենց դիրքորոշումը:
«Միգուցե Ազատության հրապարակը ավելի արդյունավետ գրասենյակ դառնա պարոն Վանեցյանի համար, քան Ազգային ժողովի իր աշխատասենյակը, որովհետև ես առնվազն չեմ հիշում, որ պարոն Վանեցյանը խորհրդարանական ակտիվությամբ փայլի»,- նկատեց Վաղարշակ Հակոբյանը:
Լրագրողների դիտարկմանը, որ այդ բողոքի ցույցերը նպատակ ունեն կանխել Արցախը հանձնելու իշխանությունների քայլերը, Հակոբյանն արձագանքեց.
«Նախ, ձեր ձևակերպումները հեռու են իրականությունից: Իշխանություններն անում են ամեն ինչ, որ Արցախի հարցում առկա շատ բարդ գործընթացը հանգուցալուծվի՝ ի նպաստ Արցախի և Հայաստանի ժողովրդի: Ես կարծում եմ, որ այն մարդիկ, ովքեր մտածում են Հայաստանի ու Արցախի մասին, նրանք Ազատության հրապարակում անելիք չունեն: Նրանց անելիքը սկսվում և ավարտվում է կառավարող ուժի հետ միասին մտածելով, թե է՞լ ինչ պետք է անենք մենք, որ ստեղծված իրավիճակը հանգուցալուծվի՝ ի նպաստ ՀՀ-ի ու Արցախի»:
Պատգամավորի խոսքով՝ իրենք արել և անում են ամեն ինչ, որ հարցի հանգուցալուծումը լինի Արցախի ու Հայաստանի շահերին համապատասխան:
«Բառախաղով, դրոշներն ամբիոնին փակցնելով՝ մենք Արցախի հարցը չենք կարող լուծել: Կարող ենք հարցը լուծել դիվանագիտությամբ, քաղաքական որոշումներով: 20-30 տարի մենք Արցախի հարցում զբաղվել ենք բառախաղով, կենացներով, պոպուլիզմով և դրա վերջը տեսել ենք՝ ինչ է: Խնդրում եմ բոլորին, եկեք դուրս գանք այդ իրավիճակից ու ռեալ հասկանանք՝ ինչ ենք անում»,- ասաց նա:
Ըստ Հակոբյանի՝ ինքը երբեք չի եղել ներկա մի քննարկման, որտեղ խոսել են այն մասին, թե Արցախը պետք է լինի Ադրբեջանի կազմում: «Մի դարձեք կեղծ օրակարգերի զոհ, մի տարածեք այդպիսի տեղեկություն»,- հորդորեց պատգամավորը:
