Ռուսաստանի արտգործնախարար Սերգեյ Լավրովը India Today-ին տված հարցազրույցում ասել է, որ Ռուսաստանը սկսում է Ուկրաինայում «հատուկ գործողության» հաջորդ փուլը:
«Այս գործողությունը շարունակվելու է։ Այժմ սկսվում է այս գործողության հաջորդ փուլը։ Վստահ եմ, որ սա կլինի ամբողջ հատուկ գործողության շատ կարևոր պահը»,- ասել է նախարարը (մեջբերումը՝ «Ինտերֆաքս»-ից): Լավրովն ասել է, որ «հատուկ օպերացիան» ուղղված է «Դոնեցկի և Լուգանսկի հանրապետությունների ամբողջական ազատագրմանը»:
ՌԴ ԱԳՆ ղեկավարը նաեւ ասել է, որ Ռուսաստանը չի պատրաստվում միջուկային զենք կիրառել «հատուկ գործողության» ժամանակ։ «Ռուսաստանը չի դիտարկում Ուկրաինայում միջուկային զենքի կիրառման հնարավորությունը, մենք խոսում ենք միայն սովորական սպառազինությունների մասին»,- ասել է Լավրովը, մեջբերում է ՏԱՍՍ-ը։
Սերգեյ Լավրովի հարցազրույցի ամբողջական տարբերակը դեռ չի հրապարակվել։ India Today ալիքի կայքում և սոցիալական ցանցերում առկա են հարցազրույցից միայն հատվածներ:
Ուկրաինայի պատերազմի ժամանակ բազմիցս բարձրացվել է Ռուսաստանի կողմից միջուկային զենքի հնարավոր կիրառման հարցը։ Փետրվարի վերջին՝ պատերազմի մեկնարկից մի քանի օր անց, ՌԴ նախագահ Վլադիմիր Պուտինը հրամայեց հատուկ հերթապահության դնել այսպես կոչված միջուկային եռյակը, որը ներառում է տարբեր տեսակի բալիստիկ հրթիռներ:
Աղբյուրը՝ Meduza-ի։
Թարգմանեց՝ Աստղ Խաչատրյանը։
