Stellantis Corporation-ը հայտարարել է, որ դադարեցնում է արտադրությունը Կալուգայում գտնվող իր գործարանում։ Այս մասին ասվում է ավտոարտադրողի կայքում հրապարակված հայտարարության մեջ։
«Հաշվի առնելով խաչաձև պատժամիջոցների և լոգիստիկ դժվարությունների աճող թիվը՝ Stellantis-ը դադարեցրել է արտադրությունը Կալուգայի իր գործարանում՝ բոլոր պատժամիջոցներին լիովին հետևելու և իր աշխատակիցներին պաշտպանելու համար: Stellantis-ը դատապարտում է բռնությունը և աջակցում է բոլոր գործողություններին, որոնք կարող են վերականգնել խաղաղությունը»,- ասվում է ընկերության հայտարարության մեջ։
Stellantis-ին է պատկանում Կալուգայում գտնվող PSMA Rus գործարանի 70%-ը, ևս 30%-ը պատկանում է Mitsubishi-ին: Գործարանը արտադրում է Peugeot 408 և Citroen C4 մարդատար ավտոմեքենաներ, Peugeot, Opel և Citroen թեթև կոմերցիոն մեքենաներ, ինչպես նաև Peugeot Partner, Citroen Berlingo և Opel Combo մինիվեններ և կոմպակտ ֆուրգոններ: Mitsubishi-ն գործարանում հավաքում է Outlander և Pajero Sport ամենագնացները:
Մարտին Ռուսաստանում նոր մարդատար ավտոմեքենաների վաճառքը, ըստ Եվրոպական բիզնեսների ասոցիացիայի, նվազել է 62,9%-ով։ Նոր մեքենաների արժեքը, ըստ «AUTOSTAT»-ի և ավտոարտադրողների, մարտին աճել է միջինը 40%-ով։
Թարգմանեց՝ Աստղ Խաչատրյանը։
