ՀՀ Ազգային ժողովի «Պատիվ ունեմ» խմբակցության պատգամավոր Թագուհի Թովմասյանի խոսքով՝ սպասում են, որ փողոցում լայն զանգված հավաքվի, որից հետո կսկսեն իրենց բուն գործողությունները: Միևնույն ժամանակ, ըստ նրա, եթե քաղաքացին չի ուզում երկրում փոփոխություն, նրանք չեն կարող փոխել։ Թովմասյանի հավաստմամբ, սակայն, իրենք տուն չեն գնալու այնքան ժամանակ, քանի դեռ Նիկոլ Փաշինյանը չի հեռացել:
«Ինչ-որ մի բան պետք է սկսել, մենք ինչ-որ մի բան սկսել ենք։ Խորհրդարանական ընդդիմությունը պայքարի տակտիկա է ընտրել ապակենտրոն, ցանցային մեթոդը։ Առաջիկա օրերին դուք կտեսնեք պայքարի մի քանի տարբեր ձևեր։ Մենք սպասում ենք կրիտիկական զանգվածի ձևավորմանը։ Մարդկանց թիվը առաջին օրերին ավելի քիչ էր, և գնալով ավելանում են։ Մեզանից պահանջվում էր գործողություն, մենք սկսել ենք։
Մնացածը՝ քաղաքացիները պետք է միանան մեզ։ Կարծում եմ՝ կմիանան, և մենք կհաջողենք ու կկարողանանք իրականացնել մեր վճռական քայլերը, բայց դրա համար մեզ անհրաժեշտ է մեր քաղաքացիների կոնսոլիդացիան։ Եթե քաղաքացին չի ուզում երկրում փոփոխություն, դու չես կարող փոխել։ Երբ քաղաքացին դրսևորի ցանկություն, առաջնորդողը կա։ Հիմա մենք սպասում ենք այդ վիճակի հասունացմանը»,- լրագրողների հետ զրույցում նշեց Թովմասյանը։
Հարցին՝ արդյոք կտրուկ գործողությունների դիմելո՞ւ են, ՀՀ ԱԺ պատգամավորը նկատեց. «Մեկ-երկու օրում որևէ փոփոխություն երբեք տեղի չի ունեցել։ Հասկանում եմ բոլորի շտապողականությունը և սպասումները, բայց պետք է իրատես լինենք և հասկանանք, որ գործողությունների մեկնարկը տրված է և պետք է սպասենք համապատասխան իրավիճակի։ Կտրուկ քայլերի համար էլ կա անհրաժեշտ ժամանակ, և այդ ժամանակը գալու է։ Բնականաբար, կտրուկ քայլեր էլ կլինեն»:
Հիշեցնենք՝ շուրջ չորս օր է՝ ՀՀ Ազգային ժողովի «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանն իր համակիրների հետ միասին նստացույց է իրականացնում Երևանի Ազատության հրապարակում:
