Հայաստանի Ազգային ժողովի արտաքին հարաբերությունների հանձնաժողովի նախագահը դատապարտելի է որակում Ուրուգվայի մայրաքաղաքում Թուրքիայի արտգործնախարարի ժեստը:
«Հայոց ցեղասպանության 107-րդ տարելիցի նախօրեին Թուրքիայի ԱԳ նախարար Մևլութ Չավուշօղլուի ազգայնական ժեստը՝ ցուցադրված Մոնտեվիդեոյում հայ համայնքի ներկայացուցիչներին, դատապարտելի գործողություն է և ոչ մի կերպ չի նպաստում երկու ժողովուրդների միջև փոխըմբռնման մթնոլորտի և երկխոսության ձևավորմանը», – գրել է Էդուարդ Աղաջանյանը:
«Ողջունում ենք ուրուգվայական կողմի անհապաղ արձագանքը՝ Թուրքիայի դեսպանին երկրի արտաքին գերատեսչություն կանչը՝ բացատրություններ ներկայացնելու համար», – ընդգծում է իշխող «Քաղաքացիական պայմանագիր» կուսակցության պատգամավորը:
Մոնտեվիդեոյում Թուրքիայի դեսպանատան առջև հավաքված հայերին Չավուշօղլուն պատասխանել է «գորշ գայլերի» նշանով։ Ուրուգվայի արտգործնախարարը Թուրքիայի դեսպանին կանչել է նախարարություն՝ այդ նշանի կապակցությամբ բացատրություններ տալու համար։
