«Հայրենիք» կուսակցության նախագահ, ընդդիմադիր պատգամավոր Արթուր Վանեցյանն իրենց պայքարի երկրորդ փուլի առաջին օրը՝ ապրիլի 25-ը, շատ լավ է գնահատում։
«Երեկ մեր երթին, ակցիաներին, նաև մյուս ակցիաներին շատ մեծ թվով մարդիկ են մասնակցել, վարորդները գրեթե 100 տոկոս ողջունում էին երթի մասնակիցներին ազդանշաններով, ձեռքերով, նաև պատշգամբներից էին մեր քաղաքացիները մեզ ողջունում»,- լրագրողների հետ զրույցում ասաց Արթուր Վանեցյանը։
Արթուր Վանեցյանը հայտնեց, որ այսօր նույնպես նախատեսված են բազմաթիվ միջոցառումներ։
Ինչ վերաբերում է երեկ ակցիաների մասնակիցների նկատմամբ ոստիկանության գործողություններին, նա նշեց. «Երեկ որոշակի կոպտություն եղել է, եղել են ուժի կիրառման դեպքեր, հարվածել են նաև ցուցարարներին։ Հույս ունեմ ոստիկանությունը չի դիմի արկածախնդրության, կշարունակի իրականացնել իր ծառայությունը, չի գնա սրացման, քանի որ անհնար է ուժով կասեցնել ժողովրդի պոռթկումը, որը տեղի է ունեցել։ Չկա նման ուժ, ոստիկանական ուժեր կամ այլ ուժեր, որոնք կարող են ժողովրդի պոռթկումը կանգնեցել, դա անհնարին է»։
Արթուր Վանեցյանը դիմեց ոստիկանությունը՝ խնդրելով կատարել օրենքով իրենց վերապահված լիազորությունները, դրանից ավելի ոչ մի բան չանել։
