Ժիրայր Պողոսյանը, ով օրեր առաջ սեփական կյանքը վտանգելով Դեբեդ գետից դուրս էր բերել 2 ամյա փոքրիկին, ԱԻ նախարարի կողմից պարգևատրվել է «Համագործակցություն հանուն փրկության» մեդալով։
«Գնացել եմ երեխային օգնելու նպատակով: Միակ բանը, որ մտածում էի՝ նրան փրկելն էր: Երբ արդեն գրկումս էր, ձեռքերս դողում էին, թե ինչպես եմ մեքենա վարել՝ չգիտեմ: Պարտք էր, որ կատարեցի: Հիմա միայն երեխայից լավ լուրի եմ սպասում. այսօր կամ վաղն անպայման կայցելեմ նրան»,- հայտնել է Ժիրայրը։
Երեխայի մոտ այս պահին կա դրական դինամիկա և նրա կյանքին վտանգ չի սպառնում:
Ճանապարհային շինարարությամբ զբաղվող Ժիրայր Պողոսյանը չի բացառում, որ գուցե ապագայում որոշում կայացնի համալրել փրկարար ծառայողների շարքերը: Հիմա մի բան է անհանգստացնում՝ երեխայի առողջական վիճակը:
Նշենք, որ Ապրիլի 25-ին Ալավերդի քաղաքում երկու տարեկան երեխա էր ընկել Դեբեդ գետը: Որոնողա-փրկարարական աշխատանքներին մասնակցող ալավերդցի երիտասարդը՝ Ժիրայր Պողոսյանը դեպքի վայրից մոտ 1 կմ հեռավորության վրա՝ Դեբեդ գետի ձախ ափին, ջրահեղձ և անգիտակից վիճակում հայտնաբերել էր երեխային, որն անմիջապես տեղափոխվել էր հիվանդանոց:
