Ֆինլանդիան մտադիր չէ կատարել Ռուսաստանի ներկայացրած պահանջը և ռուբլով վճարել գազի համար: Այդ մասին այսօր հայտարարել է Եվրոպայի և սեփականության կառավարման հարցերով Ֆինլանդիայի նախարար Տիուտտի Տուպուրայնենը:
«Մենք տնտեսական քաղաքականության հարցերով կառավարական կոմիտեում որոշել ենք, որ կառավարությունը գազի համար ռուսական արժույթով՝ ռուբլով չի վճարի»,- ասել է նախարարը:
Նրա փոխանցմամբ, դա լիովին համապատասխանում է Եվրոպական հանձնաժողովի դիրքորոշմանը, ըստ որի ռուբլով վճարելու պահանջը չի կատարվի, քանի որ դրանով կխախտվի Ռուսաստանից գազ ներկրելու գործող պայմանագիրը:
Նախարարն ասել է, որ կառավարության դիրքորոշումը փոխանցվել է գազի ներկրումն ու բաշխումն իրականացնող Gasum պետական ընկերությանը:
Gasum-ի գլխավոր տնօրեն Միկա Վիլյանենն ասել է, որ ընկերության իրավաբանները մշակում են պաշտոնական արձագանք, որով պետք է պատասխան տրվի ներկրման համար ռուբլով վճարելու Ռուսաստանի պահանջին:
Մարտի 31-ին Ռուսաստանի նախագահ Վլադիմիր Պուտինը ստորագրել է հրամանագիր, որով պահանջել է «ոչ բարեկամական երկրների» հետ գազի վաճառքն իրականացնել բացառապես ռուսական արժույթով:
Մոսկվայում «ոչ բարեկամական» են համարել այն երկրները, որոնք դատապարտել են Ռուսաստանի հարձակումն Ուկրաինայի վրա և դրա կապակցությամբ սահմանել են քաղաքական և տնտեսական պատժամիջոցներ:
Նշենք, որ Ավստրիայի իշխանությունները համաձայնել են ռուսական գազի դիմաց վճարել ռուբլով։
Ավելի վաղ նաև հայտնել էինք, որ ռուսական «Գազպրոմ»-ը Լեհաստանին և Բուլղարիային ծանուցել է, որ այսօրվանից դադարեցնում է բնական գազի մատակարարումը։
